Мэҥэ Хаҥалас бэтэрээннэрин ыспартакыйаадатыгар 28 хамаанда кыттыыны ылла
Мэҥэ Хаҥалас бэтэрээннэрин ыспартакыйаадатыгар 28 хамаанда кыттыыны ылла 🏃🏻 Бүгүн, алтынньы 8 күнүгэр, «Манчааары» успуорт-чэбдигирдэр кииҥҥэ Саха Өрөспүүбүлүкэтигэр бэтэрээннэр хамсааһыннарын 40 сылыгыр аналлаах, «Көхтөөх уһун үйэлэнии» бырайыак, аҕам саастаахтар дэкээдэлэрин чэрчитинэн XX төгүлүн улуустааҕы бэтэрээннэр ыспартакыйаадалара буолла. 🏓 Үлэҕэ-хамнаска, олоххо-дьаһахха улахан кылааттаах, баай уопуттаах, успуорду, чөл олоҕу өрө тутар, үтүө-мааны майгыларынан үүнэр көлүөнэҕэ холобур буолар ытык бэтэрээннэр парааттарын «Урожай» физическэй култуура, успуорт уопсастыбатын бэрэссэдээтэлэ, СӨ физическэй култуураҕа уонна успуорка туйгуна Виталий Пестряков салайан киллэрдэ. 🎯 Улуус 28 нэһилиэгин хамаандаларын, аҕам саастаах спортсменнары эҕэрдэ уонна махтал тылларынан улуус баһылыга Дмитрий Тихонов, Майа сэлиэнньэтин баһылыгын бастакы солбуйааччы Дмитрий Игнатьев, нэһилиэнньэ социальнай көмүскэллээх буолууга кэлим киинин салайааччытын солбуйааччы Мария Федорова, улуустааҕы социальнай бэлиитикэ управлениетын салайааччыта Октябрина Кулешова, бэтэрээннэр улуустааҕы сэбиэттэрин бэрэссэдээтэлэ Евдокия Решетникова, дуобакка Аан дойдутааҕы категориялаах арбитр, успуорт маастара Дмитрий Сыромятников көрүстүлэр. ♟️ Евдокия Решетникова: – Бүгүн Мэҥэ Хаҥаласка биһиги 20-с ыспартакыйаадабытын ыыта сылдьабыт. Быйыл 28 хамаанда кэлбитэ кэнники сылларга муҥутуур көрдөрүү буолар. Дьоннорбут үөрэн-көтөн, сүргэлэрэ көтөҕүллэн кэллилэр. Уопсайынан, мэҥэ хаҥаластар спортивнай улуус буоламмыт, эдэр эрдэхтэриттэн успуорка сыстыбыт, олохторун аргыһа оҥостубут дьоннор сааһыран да баран ону ыһыктыбаттар, ити наһаа үөрүүлээх. «Көхтөөх уһун үйэлэнии» диэн билиҥҥи бырайыакка кыттарбытынан, сылы эргиччи успуорка күрэхтэһиилэри ыыта сылдьабыт. Быйыл өрөспүүбүлүкэ пенсионердарын ыспартакыйаадатыгар бастакы миэстэни ылбыппыт. Сиһилии уонна элбэх хаартысканы БУ СИГЭНЭН киирэн билис ⬅️ @gazetaerkeii @ulusmedia