Мэҥэ Хаҥалас оройуонун тырахтарыыстарын ааттарын үйэтитэр кинигэ төрдүс туома сүрэхтэннэ
Мэҥэ Хаҥалас оройуонун тырахтарыыстарын ааттарын үйэтитэр кинигэ төрдүс туома сүрэхтэннэ 📕 Нөөрүктээйи нэһилиэгэр «Айылгы» норуот айымньытын киинигэр алтынньы ый 15 күнүгэр Мэҥэ Хаҥалас оройуонун тырахтарыыстарын ааттарын үйэтитэр кинигэ төрдүс туома – «В.И.Ленин аатынан сопхуос» диэн кинигэ сүрэхтэннэ. 🚜 Тыйыс кыһын тымныытытын, куйаас сайын итиитин аахсыбакка дойду сайдарыгар кылааттарын киллэрбит, дьоҥҥо-сэргэҕэ эт, үүт, оҕуруот аһа элбииригэр үлэлээбит ытык дьоммут аатттара «М.Горькай аатынан сопхуос», «Сэбиэскэй сойуус Дьоруойа Ф.К.Попов аатынан сопхуос», «К.К.Байкалов аатынан сопхуос», «В.И.Ленин аатынан сопхуос» диэн 4 кинигэҕэ үйэлэргэ сурулунна. Сыралаах, сүдү өйдөбүнньүк үлэни улуус кыраайы үөрэтээччилэрин, түмэл, бибилэтиэкэ үлэһиттэрин көмөлөрүнэн СӨ үөрэҕириитин туйгуна, «Гражданскай килбиэн» бэлиэ туһааннааҕа, кинигэ хомуйааччыта Татьяна Артемьева, СӨ култууратын туйгуна, кинигэ тахсыытын көҕүлээччи Александр Эверстов оҥордулар. 🛞 Киэн туттар, кэлэр көлүөнэлэргэ холобур буолар ытык дьоммутун чиэстиир, ахтар тэрээһин кыттыылаахтарын улуус баһылыгын уонна оройуон сэбиэтин дьокутааттарын ааттарыттан улуустааҕы тыа хаһаайыстыбатын управлениетын начаалынньыгын солбуйааччы Александр Борисов, Нөөрүктээйи баһылыга Иван Старостин эҕэрдэлээтилэр. Тырахтарыыстар хаартыскаларынан, ахтыыларынан олохторун уонна үлэлэрин кэпсиир хомуур үлэ кыттыылаахтара кинигэлэри сиһилии сырдаттылар. Итиэннэ сопхуостар үлэһиттэрэ, бэтэрээннэрэ, ытык кырдьаҕас дьон дэлэгээссийэнэн кэлэн ис сүрэхтэриттэн махтал тылларын тиэртилэр, ааспыт үлэ сылларын ахтан-санаан ыллылар. 📓 Александр Эверстов: – Бүгүн 3 сыл устата ыытыллыбыт «Мэҥэ Хаҥалас оройуонун тырахтарыыстара» диэн бырайыакпыт түмүктэнэр күнэ кэллэ. Бу үлэбит улууска тыа хаһаайыстыбатын сылыгар, улууска 1934 сыллаахха балаҕан ыйын 14 күнүгэр Ислам Шайхулович Мансуров аан бастаан ХТЗ тыраахтары аҕалбыта 90 сылын чэрчитинэн саҕаламмыта. Сиһилии уонна элбэх хаартысканы БУ СИГЭНЭН киирэн билис ⬅️ @gazetaerkeii @ulusmedia