Олоххо көхтөөх, илиитигэр саталлаах элбэх оҕолоох ийэ
Олоххо көхтөөх, илиитигэр саталлаах элбэх оҕолоох ийэ 🤱Хочо бөһүөлэгэр элбэх оҕолоох, олоххо көхтөөх, илиитигэр саталлаах ийэлэр элбэхтэр. Кинилэртэн биирдэстэрэ – Шестакова Аксиния Ивановна. 👨👩👧👦 Кини Бүлүү куоратыгар Светлана Дмитриевна уонна Иван Михайлович Кондаковтар дьиэ кэргэҥҥэ бастакы оҕонон күн сирин көрбүтэ. Ийэтэ өр сылларга оҕо уһуйааныгар иитээччинэн, сэбиэдиссэйинэн үлэлээбитэ. Аҕата телемаастар уонна суоппар идэлээх этэ. Бииргэ төрөөбүт быраата – Алексей Иванович. Ася 2000 сыллаахха Г.О.Чиряев аатынан оскуоланы бүтэрбитэ уонна Дьокуускайдааҕы кооперативнай техникумҥа үөрэнэн юрист идэтин ылбыта, кэлин үөрэҕин үрдэппитэ. 🐝 Аксиния Ивановна Наахараҕа кийиит буолбута быйыл үйэ чиэппэрэ буолла. Кэргэнэ Шестаков Василий Иннокентьевич – гаас инженерэ, билигин дойдутугар Хочоҕо ДЬУОКХ маастарынан үлэлиир. Шестаковтар дьиэ кэргэн 5 оҕолоохтор. Улахан кыыс Влада Васильевна үрдүк үөрэхтээх, Бүтэйдээх нэһилиэгэр баһылык солбуйааччытынан үлэлиир. Орто кыыс Анна Васильевна 2-с үрдүк үөрэҕин бүтэрэн ДЭК хампаанньаҕа экономиһынан үлэҕэ киирдэ. Кыракый кыыстара, муруннарын бүөтэ София – уһуйаан иитиллээччитэ. Улахан уол Ярослав, аҕатын туйаҕын хатаран, ХИФУ-га гаас инженерин үөрэҕэр үһүс кууруска үөрэнэр. Кыра уоллара Роберт — И.И.Платонов аатынан орто оскуола сэттис кылааһын туйгун үөрэнээччитэ. 📸 Ыал ийэтэ Аксиния Ивановна, Хочоҕо кини идэтинэн үлэ суох буолан, бэйэтигэр араас дьарыгы булар: кыракый маҕаһыыны үлэлэтэр, сайынын үүт тутар пууҥҥа үлэлиир, быйылгыттан ыҥырыаны иитиини саҕалаата. Илиитигэр саталлаах буолан араас кэрэ оҥоһуктары оҥорор, хаартыскаҕа түһэриинэн үлүһүйэн туран дьарыгырар. Сиһилии ◀️ @gazetaerkeii @ulusmedia