Бэйдиҥэҕэ саҥа врачебнай амбулатория дьиэтэ үлэҕэ киирдэ
Бэйдиҥэҕэ саҥа врачебнай амбулатория дьиэтэ үлэҕэ киирдэ Бүгүн Өлтөх нэһилиэгэр олохтоохтор өртөн күүппүт үөрүүлээх түгэннэрэ – национальнай бырайыак чэрчитинэн тутуллубут саҥа врачебнай амбулатория аһыллыытын тэрээһинэ буолла. Бу бэлиэ күҥҥэ СӨ Ил Дархана Айсен Николаев быһа онлайн сибээскэ холбонон, улуус, нэһилиэк дьаһалтатын, балыыһа үлэһиттэрин, олохтоохтору эҕэрдэлээтэ. Үөрүүлээх тэрээһиҥҥэ улуус баһылыга Василий Алексеев, Өлтөх нэһилиэгин баһылыга Константин Алексеев, улуустааҕы киин балыыһа кылаабынай бырааһа Сергей Черкашин, Бэйдиҥэтээҕи врачебнай амбулатория бырааһа Күннэй Винокурова саҥа тутуу аһыллар бэлиэтин – аалай лентаны быстылар. Бу күн өссө биир бэлиэ түгэнинэн саҥа арыллыбыт балыыһа дьиэтигэр СӨ медицинэ, доруобуйа харыстабылын салаатыгар сүҥкэн кылааты киллэрбит, биллиилээх учуонай, медицинэ наукатын кандидата Петр Маркович Желобцов аата иҥэрилиннэ. Өйдөбүнньүк бэлиэни арыйарга Петр Маркович аймахтара, бииргэ үлэлээбит дьоно, улуус салайааччылара кытыннылар. Оттон Александр Николаевич Жирков аатынан Бэйдиҥэ орто оскуолатын иһинэн үлэлиир «Тэтим» оҕо үҥкүү бөлөҕө (салайааччы Людмила Кириллина)«Эҕэрдэ үҥкүүтүн» толордулар. Бүгүҥҥү тэрээһиҥҥэ балыыһа тутуутун иилээн-саҕалаан ыыппыт тэрилтэ салайааччыта Нюргустан Пестряков эҕэрдэтин, үтүө баҕа санаатын тиэртэ, харда тылы өр сылларга Бэйдиҥэ балыыһатыгар үлэлээбит бэтэрээннэр ааттарыттан бэтэрээн үлэһитэ Екатерина Андросова эттэ. Бүгүн Бэйдиҥэтээҕи врачебнай амбулаторияҕа эдэр, кэскиллээх быраас Күннэй Ионовна Винокурова, өр сылларга үлэлээн кэлбит уопуттаах үлэһиттэрбит - фельдшер Марфа Лаврентьевна Иванова, медсестра Саргылана Кирилловна Сыроватская уонна санитарка Екатерина Афанасьевна Охлопкова бар дьон доруобуй, чэгиэн буоларын туһугар үлэлии сылдьаллар. Үөрүүлээх тэрээһиҥҥэ үгүс үтүө баҕа санаа, арчылаах алгыс тыла этилиннэ. 📲Мах-каналбытыгар сурут ⬇️ https://max.ru/channel_ua_murusahargata 🌐 https://мюрюгазета.рф/ ✅ @uamurusahargata @ulusmedia