Маамыкааҥҥа күөх төлөн холбонно
Маамыкааҥҥа күөх төлөн холбонно ♨️Томороон тымныылаах, тоһуттар дьыбардаах, тыйыс айылҕалаах хотугу дойдубутугар күөх төлөн күлүмнүү умайан сарсыҥҥыга эрэли үөскэтэр, сарыаллаах саҕаҕы күндээрдэр. 🔹 Бүгүн, алтынньы 23 күнүгэр, Майа сэлиэнньэтигэр Удьуор утумун сылыгар сөп түбэһиннэрэн ураты үөрүүлээх түгэн бэлиэтэннэ. Маамыкаан түөлбэтин элбэх оҕолоох ыалларын кыбаарталыгар күөх төлөн холбонно. Бу эҥэргэ олохсуйбут үгүс ыал алаһа дьиэлэрэ быр-бааччы сылааһынан илгийэн уйгута тускуланна. 🔹 Үөрүүлээх түгэҥҥэ тоҕуоруһа мустубут түөлбэ олохтоохторун улуус баһылыга Дмитрий Тихонов, «Сахатранснефтегаз» аахсыйалаах уопсастыба салайааччытын солбуйааччы Дмитрий Павлов, Майа сэлиэнньэтин баһылыгын солбуйааччы Дмитрий Игнатьев эҕэрдэлээтилэр. Салайааччылар дойду Бэрэсидьиэнэ Владимир Путин уурааҕынан нэһилиэнньэни гааска холбооһуну олоххо киллэрэр федеральнай бырагыраама өрөспүүбүлүкэбитигэр тэтимнээхтик ыытылларын бэлиэтээтилэр. Ол чэрчитинэн улууспутугар 18 нэһилиэккэ 7300 кэриҥэ олорор дьиэ күөх төлөҥҥө холбоммутун, бу көрдөрүү 63% тэҥнэһэрин сырдаттылар. Улуус баһылыга Дмитрий Тихонов «Сахатранснефтегаз» хампаанньа генеральнай дириэктэрэ Алексей Колодезников Маамыкаан түөлбэтин гаас ситимигэр холбуур туһунан былырыыҥҥы сөпсөһүүтүн куоһаран Майа алааһыгар күөх төлөн холбонорун иһитиннэрдэ. 🔹 «Сахатранснефтегаз» хампаанньа салайааччытын солбуйааччы Дмитрий Павлов хампаанньа социальнай гаастааһын үлэтин быйылгы былаанын толорбутун, өрөспүүбүлүкэҕэ 1500 ыал ситимҥэ холбоммутун туһунан сырдатта. Бэлиэ түгэҥҥэ Анастасия Федорова салайааччылаах «Сахатранснефтегаз» хампаанньа Мэҥэ Хаҥаластааҕы учаастагын тэтимнээх үлэтэ махтал тылынан бэлиэтэннэ, үтүө суобастаах исписэлиистэр идэлэригэр бэриниилээх үлэлэрин иһин наҕараадаланнылар. 🔹 Саҥа дьиэлэринэн сандаарыйа кэҥээбит түөлбэ салайааччыта Мария Попова үтүө түгэн туһунан санаатын бу курдук үллэһиннэ: — Маамыкааҥҥа элбэх оҕолоох ыалга учаастагы түҥэтии 2014 сыллаахтан саҕаламмыта. Бу бырагыраама бүтүн дойду үрдүнэн көхтөөхтүк ыытыллар. Түөлбэбитигэр үгүс эдэр ыал, кэнчээри ыччат олохсуйда. Инникитин граннарга кыттан былаһаакаа туттарар, сырдатыы үлэтин ыытар былааннаахпыт. Сиһилии ⬅️ @gazetaerkeii @ulusmedia