🐎Марина Оконешникова: «Дьөһөгөй айыыга сүгүрүйэн»
🐎Марина Оконешникова: «Дьөһөгөй айыыга сүгүрүйэн» 🎨Саха норуотун илгэлээх олоҕо Күн Дьөһөгөй оҕотун – сылгыны кытта ыкса ситимнээх. Дьөһөгөй айыы тыйыс кыһыннаах, дьыбардаах тымныылаах Хотугу дойдубутун арчылыыр, араҥаччылыыр, өбүгэлэртэн ситимнээх олохпутун салайсар. Ол да иһин айар куттаах, дьүһүйэр аналлаах талба талааннаахтарбыт сылгы култууралаах норуоппут уратытын сиэдэрэй үлэлэригэр сириэдитэллэр, ураннык чочуйан үйэтитэллэр. Сылгыны иитэн норуот үгэһин ууһатар саха далбар ыалынан Нөөрүктээйи нэһилиэгин олохтоохторо – Марина уонна Егор Оконешниковтар буолаллар. Кинилэр Дьөһөгөйү кытта ыкса ситимнээх тапталларын устуоруйата «Спид Стар» диэн бүтүн дойду күөх экраныгар көстөн көрөөччү биһирэбилин ылбыт киинэҕэ хоһуйуллубута. Ураты дьарыктаах ыал олоҕун кэпсээнэ сылгыга сүгүрүйүү, таптал тыыннаах туоһута буолар. Ыал аҕатын, саха норуотугар биллэр ат сүүрдээччини – Егор Оконешниковы билбэт киһи, бука суоҕа буолуо. Өрөспүүбүлүкэҕэ ат сүүрдүүтүн успуордун сайыннарыыны көҕүлүүр маастар-жокей Ил Дархан Кубогын 5 төгүллээх кыайыылааҕа, саха Дербитын чөмпүйөнэ. Кини сулустуу суһумнуур кыайыыларын эрэллээх эркининэн кэргэнэ Марина Дмитриевна буолар. Марина – туспа айар-тутар суоллаах худуоһунньук, туойунан дьүһүйүүнэн дьарыктанар керамист, ат сүүрдүүтүн успуордугар конкур тириэнэрэ. Кини айар үлэтигэр саха норуотун сылгыны иитэр төрүт дьарыга, Дьөһөгөй айыыга сүгүрүйүү итэҕэлэ, ат успуорда дьэҥкэтик ойууланар. Сиһилии⏪ @gazetaerkeii @ulusmedia