🐄 Бүгүн Мэҥэ Хаҥалас улууһугар икки хотон үлэҕэ киирдэ
🐄 Бүгүн Мэҥэ Хаҥалас улууһугар икки хотон үлэҕэ киирдэ 🌿 Бүгүн, сэтинньи 6 күнүгэр, Мэҥэ Хаҥаласка СӨ Тыа хаһаайыстыбатын уонна ас-үөл бэлиитикэтин министиэристибэтин «Кыра кыамталаах эбийиэктэр» бырагырааматынан Дьаҥхаады уонна 1-кы Баатара нэһилиэктэригэр 100-түү хороҕор муостаах турар хотонноро үлэҕэ киирдилэр. 14 мөлүйүөн солкуобай суумалаах эбийиэктэри аныгы матырыйаалынан, бетон муосталаан Төхтүргэ «Илгэ» ТХПК-ҕа «Феномен» ХЭТ, Бэдьимэҕэ «Сүүрээн» ТХППК-ҕа «Алтус» ХЭТ тутуу хампаанньалара уонна нэһилиэк олохтоохторо сомоҕо субуотунньук күүһүнэн туттулар. 🙌🏼 Хотоннор арыллар үөрүүлээх күннэригэр саха омук үгэһинэн алгыс сиэрин-туомун алгысчыттар Спиридон Григорьев, Зиновий Игнатьев толордулар. 👏 Нэһилиэк сайдыытыгар, ыччат үлэлээх буолуутугар, ыаллар олохторун тупсарыыга улахан көмө буолар эбийиэктэр арыллар күннэригэр нэһилиэк олохтоохторун улуус баһылыга Дмитрий Тихонов, СӨ Тыатын хаһаайыстыбатын уонна ас-үөл бэлиитикэтин миниистирин эбээһинэһин толорооччу Анна Стручкова, СӨ Тыатын хаһаайыстыбатын уонна ас-үөл бэлиитикэтин миниистирин солбуйааччы Георгий Гаврильев, Дьаҥхаады нэһилиэгин баһылыга Алексей Шарин, «Илгэ» ТХПК бэрэссэдээтэлэ Евдокия Холмогорова, 1-кы Баатара баһылыга Петр Андросов, «Сүүрээн» ТХППК бэрэссэдээтэлэ Василий Неустроев эҕэрдэлээтилэр, наҕараадалары туттардылар. 🗣 Евдокия Холмогорова: – Кырдьаҕас, аҕам саастаах дьоммут сүөһүлэрин эспэттэрин туһуттан уонна олохтоох дьоммут үлэлиибит диэбиттэриттэн тирэнэммит, саҥа хотону туттубут. Ханна да буоларын курдук, саамай улахан оруолу үлэһит киһи быһаарар. Үлэһит киһи баар буоллаҕына, сайдаҕын, кэҥиигин. «Кыра кыамталаах эбийиэктэр» бырагырааманы 2025 сыллаахха оччолорго нэһилиэк баһылыгын Василий Стручкову кытта докумуоннарбытын биэрэн, үбүнэн көмө ылбыппыт. Билиҥҥи туругунан, чааһынай дьон 70 сүөһүтэ турар, бу иһигэр 27 ыанар ынах баар. Өссө да сорох сүөһүлэрбитин аҕалан толоруохпут. 3 үлэһит баар. Отунан толору хааччыллан кыстыкка киирдибит. Чааһынай дьоммут бэйэлэрин ынахтарын сиир отторун аҕалбыттара. Сүөһү иһэр уута уһааттан кырааны холбоотоххо кэлэр, уоннааҕы хотон үлэтэ илии күүһүнэн оҥоһуллар. Хороҕор муостаах ахсаана аҕыйаабакка хойдоругар, сыспай сиэллээх сыһыы муҥунан элбииригэр баҕалаахпыт, – диэн эттэ. Сиһилии уонна элбэх хаартысканы БУ СИГЭНЭН киирэн билсиҥ ⬅️ @gazetaerkeii @ulusmedia
Канал в каталоге Максиметера
7 396 подписчиков · Новости