Управление финансов администрации МО "Тахтамукайский район"
Новости · 21 мая 2026 г.
Непэ Адыгэ Республикэм ыкlи зэрэдунаеу щыпсэурэ адыгэхэм Кавказ заом хэкIодагъэхэм афэг... — 21 мая 2026 г. в 08:10:03.151
Непэ Адыгэ Республикэм ыкlи зэрэдунаеу щыпсэурэ адыгэхэм Кавказ заом хэкIодагъэхэм афэгъэхьыгъэ шъыгъо-шIэжь мафэ хагъэунэфыкlы. Россием ыкlи Кавказ лъэпкъхэм яхъишъэ хэтыгъэ анахь хъугъэ-шIэгъэ гугъэузхэм ащыщ къыпхырыкlыгъэхэм, ыкlи хьазабышхо зыщэчыгъэ цlыфхэм апае непэ тэшъыгъо. А заом гууз-лыузышхо къыздихьыгъ, бэ хэкIодагъэр, ащ итыркъо лIэуж пчъагъэмэ къатенэжьыщт. Тятэжъ пIашъэхэм ялIыхъужъныгъэрэ япсэемыблэжьыныгъэрэ тщыгъупшэрэп, мамыр щыIакIэм уасэу иIэр ыкIи тарихъ шIэжьыр щыIэным мэхьанэшхо зэриIэр къыдгурэIо. КъыткIэхъухьащтхэм апашъхьэ пшъэдэкIыжьэу щытхьырэр икъоу зэхатшIэзэ, тиижъырэ чIыгу ренэу мамырныгъэ илъыным, лъэпкъ зэфэшъхьафхэм къахэкIыгъэхэмрэ дин зэмылIэужыгъохэр зылэжьыхэрэмрэ зэгурыIонхэм, тигупсэ Адыгеим хэхъоныгъэ ышIыным, Урысые Федерациер джыри нахь зэтегъэпсыхьагъэ хъуным тиIахьышхо хэтшIыхьаным кIуачIэу тиIэр зэкIэ етхьылIэщт. Тятэжъ пIашъэхэр зыщытымыгъэгъупшэхэу, тарихъым идесэ тхьамыкIагъохэм тарыгъуазэзэ, неущрэ мафэм тицыхьэ телъэу тыфэкIо. ЛIэшIэгъубэ къызэпызычыгъэ тикультурэрэ тишэн-хабзэхэмрэ IэубытыпIэ къызыфэтшIыхэзэ, тигухэлъхэм тафэкIон, цIыф лъэпкъ зэфэшъхьафхэм азыфагу илъ зэгурыIоныгъэр, шъхьэкIэфэныгъэр къэтыухъумэн, Урысыем изыкIыныгъэ дгъэпытэн фае. Урысые Федерацием и Президентэу Владимир Путиным зэрэхигъэунэфыкIыгъэу, «цIыф лъэпкъ зэфэшъхьафхэу тихэгъэгу щыпсэухэрэм якультур, абз, яшэн-хабзэхэр, язэкъошныгъ ары ащ кIуачIэ къезытырэри, лъэпсэ пытэ фэхъурэри. Тарихъым исыд фэдэрэ къэгъэзапIи ары тыхэзыщыжьыгъэр, шIэныгъэм, искусствэм текIоныгъэшхохэр ащытшIынхэмкIи, ЯтIонэрэ дунэе заом ТекIоныгъэр къыщыдэтхынымкIи, нацизмэр зэхэткъутэнымкIи лъэпсэшIу хъугъэр». Непэ тичIыпIэгъухэу хэушъхьафыкIыгъэ дзэ операцием хэлажьэхэрэр Украинэм инеонацистхэм апэуцужьых, къушъхьэчIэс лIыхъужъхэм зэряпэсыгъэу, ятэжъ пIашъэхэр ящысэтехыпIэу япшъэрылъ агъэцакIэ. Урысыем щыпсэурэ нэмыкI цIыф лъэпкъхэм къахэкIыгъэхэм ягъусэхэу Адыгеим икIыгъэ дзэ къулыкъушIэхэм Хэгъэгум ифедэхэр къагъэгъунэх, къыткIэхъухьащт лIэужхэм мамыр щыIакIэ яIэным фэбанэх. Адыгеим щыпсэухэрэмрэ тихэгъэгушхо ис нэмыкI цIыф лъэпкъхэмрэ блэкIыгъэр зыщамыгъэгъупшэу, аIэ зэкIэдзагъэу ти Хэгъэгушхоу нахь зэтегъэпсыхьагъэ, нахь лъэш хъуным тапэкIи зэрэфэлэжьэщтхэм тицыхьэ телъ.