🔹 Тывада боттарының бажыңнарынга өрт медээчизин халас салдырар эргелиг чурттакчылар бо... — 23 мая 2026 г. в 15:02:44.271
🔹 Тывада боттарының бажыңнарынга өрт медээчизин халас салдырар эргелиг чурттакчылар бо ачы-дузаны алырда ам документилер чыгбас. Тываның Баштыңы Владислав Ховалыгның даалгазы-биле өрегелерни ол медээчилер-биле хандырарының чурумунче өскертилгелерни киирип, хамаатыларны социал деткимчениң ол хевиринге хереглелдиин бадыткаарындан хостаан. Ооң мурнунда бажыңынга ышты дораан эскерип каар өрт медээчизин салдырарда, амыдырап-чурттаарының хемчээлинден эвээш орулгалыг деп справказын көргүзери албан турганын сагындыраал. Ам электроннуг почта таварыштыр кожууннарда Өг-бүле болгаш уругларның социал дуза төвүнче чүгле билдириишкинни киирер. Төп бодунуң төлээлерин чоруткаш, билдириишкин киирген кижиниң чурттап турар байдалын хынап көргеш, дериг-херекселди салырын шиитпирлээр. 2018 чылдан бээр Тывада чамдык бөлүктүң хамаатыларынга автономнуг өрт медээчилери-биле хандырар программа ажылдап турар. Ону өрттер, ыш, угарлыг ыш-биле хораннаныышкынны болдурбазы-биле, печка одаар бажыңнарда чурттап турар эвээш орулгалыг болгаш хөй ажы-төлдүг өг-бүлелерге, ол ышкаш инвалид ажы-төлдүг өг-бүлелерге дуза кылдыр кылган. ТР-ниң Күш-ажыл яамызының дыңнатканы болза, 7 чылдың дургузунда 6067 өг-бүлеге ол херекселдерни салган, оларның чартыындан хөйү ол дузаны алыр эргелиг хамаатылар. А 2026 чылда 1700 медээчини салыры планнаттынган. Өртке удур медээчи салдырар дугайында билдириишкиннер манап турбайн, чамдык өг-бүлелерге ону дарый эптеп эгелээр дээн Күш-ажыл яамызының специалистериниң бодалын Тываның Баштыңы деткээн. Амыдыралдың берге байдалдарынга таварышкан болгаш социал айыылдыг, колдуунда-ла ижер өг-бүлелер озал-ондактыг таварылгаларны тургузуп турары билдингир. Амгы үеде республиканың социал албан черлериниң учедунда 800 ажыг ындыг өг-бүлелер бар. Беш өг-бүлениң бирээзиниң-ле орулгазы амыдырап-чурттаарының кудуку деңнелин ажа бээр болгаш, өрт медээчизин халас салдырар чурумче кирбейн турар. Ындыг болзажок, оларның бажыңнарынга халас медээчилерни салыры ниити айыыл чок чорукка чугула херек.