Тыйаатыр саалатыгар Суорун Омоллоон 120 сылыгар аналлаах үөрүүлээх мунньах уонна кэлэр ...
Тыйаатыр саалатыгар Суорун Омоллоон 120 сылыгар аналлаах үөрүүлээх мунньах уонна кэлэр 2026–2027 үөрэх сылын былааннара Тыйаатыр киэҥ саалатыгар ыытыллыбыт пленарнай чаас, Суорун Омоллоон төрөөбүтэ 120 сылыгар анаммыт үөрүүлээх мунньах уонна 2026–2027 саҥа үөрэх сылын сүрүн соруктарын торумнааһын тэрээһин күннээҕи үлэтин үрдүк таһымҥа түмүктээтэ. Бу дьоро киэһэни эҕэрдэ тыллар, истиҥ ахтыылар уонна кэскиллээх былааннар киэргэттилэр. Үөрүүлээх тэрээһиҥҥэ мустубут бар дьону улуус баһылыга Айаал Семенович Бурцев, Суорун Омоллоон кыыһа Люция Дмитриевна Васильева, Үөрэх салалтатын начаалынньыга Иннокентий Иннокентьевич Дягилев, МПГУ Аһаҕас үөрэх эйгэтин сайыннарар киинин дириэктэрэ Надежда Борисовна Самойлова, «Оҕо саас сирдьиттэрэ» региональнай тирэх киин салайааччыта Нюргуяна Владимировна Макарова, Суорун Омоллоон аатынан Опера уонна балет тыйаатырын дириэктэрэ Владислав Валерьевич Лёвочкин, Таатта улууһун үөрэх эйгэтин биир идэлээхтэрин сойууһун бэрэссэдээтэлэ Прокопий Васильевич Борисов уонна сүрүн дакылааччыт, «Сахабэчээт» ГАУ дириэктэрин сүбэһитэ Валентина Ивановна Бочонина истиҥник эҕэрдэлээтилэр. Үтүө үгэс быһыытынан, бу күн бастыҥ үлэлээх учууталларга, педагогтарга уонна үөрэх эйгэтин бэтэрээннэригэр наҕараадалары туттардылар. Ону тэҥэ биһиги улууспутугар саҥа үлэлии-хамныы кэлбит эдэр педагогтары чиэстээтилэр, кинилэргэ айымньылаах суолу баҕаран туран, өйдөбүнньүк бэлэхтэри туттардылар. Тэрээһин бары кыттааччылары сомоҕолоон, инники айар-тутар үлэҕэ күүстээх санааны сахта уонна духуобунай нэһилиэстибэни харыстааһыҥҥа, көлүөнэлэр утумнаһыыларын бөҕөргөтүүгэ далааһыннаах хардыынан буолла.