Ытыктабыллаах биир идэлээх киһибит Пелагея Афанасьевна! — 24 августа 2026 г. в 01:56:01.012
Ытыктабыллаах биир идэлээх киһибит Пелагея Афанасьевна! Эйиигин бу Орто дойдуга төрөөн уөскээн 90 ытык сааскын томточчу туолбут, кэрэ-бэлиэ кэрдиис кэмҥинэн, үөрүүлээх күҥҥүнэн ис сүрэхпититтэн истиҥник эҕэрдэлиибит! Пелагея Афанасьевна, ветеринарнай управление сардаҥалаах сарсыҥҥытын туһугар өр сылларга өйгүн-санааҕын, күүскүн-уоххун, билиигин-көрүүгүн, бүтүннүүтүн ууран кыайыылаахтык-хотуулаахтык, үлэлээн-хамсаан сылдьыбыккыттан биһиги бииргэ үлэлээбит дьонун-сэргэн киэн туттабыт уонна махтанабыт. Эн «И. В. Сталин» аатынан, кэлин «Якутскай» диэн ааттаммыт совхозка аан бастаан үлэҕин саҕалаабытын. Мархаҕа саҥа «Елочка» аппарат систематынан ынах ыырга Саха сиригэр бастакы бастыҥ үлэһитэ этиҥ, историяҕа киирбитин. Үлэҕэр үрдүк көрдөрүүгүнэн ол саҕана Москва куоракка ВДНХ-ҕа путевканан наҕараадаламмытын, ветеринар идэтигэр үөрэнэр чиэскэ тиксибитин. 1964 сылтан ветеринарнай службаҕа үлэҕин саҕалаабытын. Үлэлиир кэмнэргэр бруцеллез, туберкулез, паратуберкулез, лейкоз уонна да атын ыарыылары кытта киирсиилээхтик охсуһан кыайбыккыт, ыарыылар тохтотуллубуттара. Туруулаахтык үлэлээбитин, олоххо баай көрүүн, үөрүйэҕин, санаан күүһэ биһиэхэ мэлдьи холобур буолар. Күндү Пелагея Афанасьевна! Баҕарабыт эйиэхэ сырдык ыраас халлааны, ыарыы ыалласпатын,дьаҥ-дьаһах халты хаамтын, үтүө ыран туолан, санаабытын ситэн истин диэн айхаллыыбыт. Оҕолоруҥ-сиэннэриҥ тапталларыгар бигэнэн өссө да уһуннук, дьолоохтук олорон, үгүс дьоҥҥун үөрдэ сырыт! Айыы киһитин сирдээҕи олоҕун ыйар үтүө санаалаах айыыларбыт- Айыыһыт, Иэйэхсит-араҥаччылаан сырыттыннар! Дьокууйскайдааҕы ветеринарнай управление коллектива.