Үлэһит киһи умнуллубат
Үлэһит киһи умнуллубат Алтынньы 20 күнүгэр, Аҕа саастаахтарга аналлаах тэрээһиннэр чэрчитинэн, Баайаҕатааҕы ветеринарнай учаастак сэбиэдиссэйэ Ольга Ивановна Бурнашова тэрийиитинэн, Таатта улууһун социальнай-экономическай сайдыытыгар киллэрсибит үтүөлэрин иһин Бочуоттаах кинигэҕэ киирбит, улуус Бочуоттаах олохтооҕо үрдүк аатынан бэлиэтэммит, 43 сыл устата тыа хаһаайыстыбатыгар бэтэринээр быһыытынан үлэлээбит Роман Павлович Неустроев сырдык аатыгар аналлаах «Үлэһит киһи умнуллубат» диэн ааттаах «Музей в чемодане» форматынан быыстапка тэриллиннэ. Быыстапканы аһыыга Роман Павловиһы кытта биир отделениеҕа үлэлэспит, бииргэ алтыспыт дьон ыҥырыллан, кэлэктиип ыалдьыттарынан кыттыыны ыллылар. Роман Павлович туһунан кыра да буоллар, сырдык, истиҥ ахтыылар этиллибиттэрэ. Илиитин араарбат, дьулуурдаах үлэтин, профсоюз председателинэн уонна партийнай тэрилтэ секретарынан үлэтин, кэргэн, аҕа уонна киһи быһыытынан сэмэй, кэрэ майгытын өйдөөн ахтан, махтанан кэпсээтилэр. Роман Павлович көрүдьүөстэрин, олох суолун-сорҕотун туһунан элбэх ахтыы этилиннэ. Сандалы тула олорон, сүөгэйдээх алаадьы, арыылаах саламаат аһыы, өймөкөөннөрү ньымаларынан бэлэмнэммит ис дьиэлээх аһы амсайа-амсайа, үлэһит киһи туһунан ирэ-хоро ахтан-санаан аастыбыт. Кэлин быыстапканы көрөн, Роман Павлович олохтоох суолун, үлэтин-хамнаһын уонна дьонугар оҥорбут үтүөтүн билиһиннэрдилэр. Санаабытыгар, күлбүтүнэн, тугу эрэ дьээбэлээҕи эппитинэн, Роман Павлович биһиги кэккэбитигэр олорор курдук буолла. Маннык дьоро, өйдөбүллээх күну бэлэхтээбит Ольга Ивановнаҕа, Александра Васильевнаҕа, Василий Романовичка уонна эдэр специалист Диана Юрьевнаҕа ис сүрэхтэн махтанабыт! Үлэһит киһи умнуллубат. Үтүө аат, үтүө үлэ, үтүө өйдөбүл дьон сүрэҕэр үйэлэргэ тыыннаах буолуо. Таатта улууһун ветеринарнай управлениетын кэлэктиибэ