🌿⚜️Горнайга-үбүлүөйдээх ыһыах
🌿⚜️Горнайга-үбүлүөйдээх ыһыах Бэс ыйын 25 күнүгэр, улуус төрүттэммитэ 95 сылыгар анаммыт «Уруйдан, төрүт дойдум Горнай» үбүлүөйдээх Үрүҥ Тунах ыһыаҕа киэҥ далааһыннаахтык ыытылынна. Үбүлүөйдээх ыһыахха кэлбит ыалдьыттары Аал Луук Мас аттыгар кымыһынан, алаадьынан, ис миининэн күндүлээтилэр. Ыһыах сахалыы сиэри-туому тутуhан, үөрүүлээхтик аһылынна. Үбүлүөйдээх ыһыах алгыһын алгысчыт Алгыстаан Дуруһаал түстээтэ. Кымыс үрдүн охторуу сиэрэ-туома ыытылынна. Алгысчыт толору кымыстаах чороону улуус баһылыгар Никита Андреевка утары уунна. Никита Викторович үс өттүгэр үрүҥ илгэни ыста, кымыһы ыймахтаата, чороону өрө көтөҕөн дьонун-сэргэтин уруйдаата. Түһүлгэҕэ кэлбит ыалдьыттары кымыһынан күндүлээтилэр. Дьөһөгөй үҥкүүтүн «Күлүмчээнэ», «Аламай сулус», «Эҕэрдэ» үҥкүү кэликтииптэрин 82 үҥкүүүһүттэрэ толорбуттара ыһыах үөрүүтүн үрдэттэ. Кииммитин түһэрбит сирбит, киэн туттар дойдубут Горнай улууһа Нам уонна Хаҥалас улуустарыттан төрүттэнэн, 95 сыла буолан Ытык Дуоҕаны, Горнай, Нам, Хаҥалас былаахтарын тутан, 95 сахалыы таҥастаах дьон сэлэлии хааман киирбиттэрэ улуус ыһыаҕын арыллыытын байытан биэрдэ. Улуус баһылыга Никита Андреев 9 нэһилиэк баһылыктарын кытта Үрүҥ Тунах ыһыах мэҥэ бэлиэтин ытык сэргэҕэ олордуу туомун толордо.