Олоҥхо ыһыаҕыттан «Төрүт дорҕоон” кырыымпаһыттар бөлөхтөрө ситиһиилээх кэллилэр. — 8 июля 2026 г. в 02:32:07.399
Олоҥхо ыһыаҕыттан «Төрүт дорҕоон” кырыымпаһыттар бөлөхтөрө ситиһиилээх кэллилэр. ⚜️От ыйын 4-5 күннэригэр “Үс өрүс тардыылаах, уу чалгый куттаах Кэбээйигэ – саха сирин тэбэр сүрэҕэр” Өрөспүүбүлүкэбитигэр XIX төгүлүн ыытыллыбыт Олоҥхо ыһыаҕар Сэмэн уонна Соппуруон Даниловтар ааттарынан Духуобунас киинэ “Куйаар кутуллар дорҕооно” кылыһах-кырыымпаҕа оонньооччулар күөн күрэстэрин иилээн саҕалаан ыыттыбыт. ⚜️Күрэххэ уопсайа 12 ансаамбыл уонна биирдиилээн толорооччуларга 21 кырыымпаһыт кыттыыны ыллылар. Өрөспүүбүлүкэттэн 12 улуус уонна 2 куорат: Мэҥэ-Хаҥалас, Нам, Амма, Чурапчы, Кэбээйи, Горнай, Үөһээ-Бүлүү, Ньурба, Бүлүү, Таатта, Ленскай, Уус-Алдан улуустара, уонна Дьокуускай Нерюнгри куораттартан кырыымпаһыттара кэлэн күөн көрүстүлэр. Күрэх ирдэбилинэн 1 норуот ырыатын матыыбыгар композиция уонна олоҥхо сюжетыттан (сэрэбиэйинэн талан ылан) тутатына хоһуйан матыыбы таһаарыахтаахтар. Матыыбка “Орто дойду айыллыыта”, “Үөһээ дойду”, “Айыылар көстүүлэрэ”, “Бухатыыр төрөөһүнэ”, “Айыы бухатыырын кытта абааһы бухатыыра охсуһуулара”, “Кыайыы өрөгөйө” диэн тиэмэлэр киирбиттэрэ. ⚜️Дьүүллүүр сүбэҕэ СӨ үтүөлээх артыыската, С. А. Зверев – Кыыл Уолун аатынан национальнай оркестр артыыската, “Кыл Саха” ансаамбыл салайааччыта А. И. Томская, олоҥхо тыйаатырын артыыһа А. Кысылбаиков уонна Кэбээйитээҕи кырыымпаһыттар ансаамбылларын салайааччыта И. Г. Кобякова үлэлээтилэр. ⚜️Кылаан кыайыылаах ааты Мэҥэ-Хаҥалас улууһун Майа сэлиэнньэтин “Дьиэрэй” ансаамбыла ылла. ⚜️Духуобунас киинин иһинэн дьарыктанар, Лилия Тарасова салайааччылаах, “Төрүт дорҕоон” кырыымпаһыттар бөлөхтөрө “Олоҥхо дорҕооно” диэн композицияны, олоҥхо сюжетыгар “Бухатыыр төрөөһүнэ” диэн тиэмэҕэ тубэһэн, оонньоон, “Саҥа ааттар” диэн анал ааты 5000 сууммалаах сэртипикээтинэн наҕараадаланан үөрүүбүт үрдээтэ. Бөлөх кыттыылааҕа, кыл кырыымпа маастара, Аргунов И. Н. биирдиилээн толорооччуларга кыттан “Уран уус – кылыһах кырыымпа” диэн анал аакка тиксэн үөрүүтэ икки бүк үрдээтэ. ⚜️Бу тиксибит анал ааттар инникитин өссө күүскэ дьарыктанан, аны бириистээх миэстэлэргэ дьулуһарга олук буолаллар. ⚜️Маны таһынан Олоҥхо ыһыаҕын сабыллыытыгар күрэххэ кыттыбыт бары кырыымпаһыттар күргүөмүнэн оонньоон арыйдылар. Бу бэлиэ түгэҥҥэ “Төрүт дорҕоон” ансаамбыл кыттыыны ылан, сүргэбит көтөҕүллэн туран оонньоотубут. ⚜️Инникитин улууспутугар кыл кырыымпаны сэҥээрээччилэр, оонньооччулар элбээн, кырыымпа дорҕооно элбэх сиргэ доруойа доллоһутуо, араас хабааннаах тэрээһиннэргэ элбэхтэ иһиллиэ диэн бигэ эрэллээхпит! Лилия Тарасова Семен уонна Софрон Даниловтар ааттарынан Духуобунас киинин режиссера, “Төрүт дорҕоон” кырыымпаһыттар бөлөхтөрүн салайааччыта