Горнай Маҕараһыгар учуонай, тыл билимин дуоктара, бэрэпиэссэр, лингвист, саха тылын кыр...
Горнай Маҕараһыгар учуонай, тыл билимин дуоктара, бэрэпиэссэр, лингвист, саха тылын кырамаатыкатын исписэлииһэ, Саха АССР үтүөлээх учуутала, Саха АССР наукатын үтүөлээх диэйэтэлэ Лука Никифорович Харитонов төрөөбүтэ 125 сылыгар аналлаах өрөспүүбүлүкэтээҕи пуорум саҕаланна. Лука Никифорович төрөөбүт тылы харыстыырга анаан хас даҕаны үлэни суруйбута уонна киэҥ эйгэҕэ тарҕаппыта. Олор истэригэр: «Саха тылын грамматиката», «Современный якутский язык. Фонетика и морфология», «Типы глагольной основы в якутском языке», «Грамматика современного якутского литературного языка. Фонетика и морфология», «Формы глагольного вида в якутском языке», «Залоговые формы глагола в якутском языке», «Русско-якутский словарь», «Якутско-русский словарь», «Орфографический словарь якутского языка». Пуорум өрөспүүбүлүкэбит араас муннугуттан саха тылын, литэрэтиирэтин, култууратын учууталларын, алын кылаас учууталларын, уһуйаан иитээччилэрин түмтэ. Тэрээһин чэрчитинэн маастар-кылаастар, «Һөҕүҥ» быыстапка, төрүт ас быыстапка-дьаарбаҥката ыытыллаллар. Лука Никифорович албан аатын үйэтитэргэ уонна үтүө дьыалатын салгыырга анаммыт пуорум кыттааччыларга инники үлэлэригэр тирэх буолуо диэн эрэнэбин. Афанасий Ноев