«Бага наhанhаа буряад хэлэндээ дуратайб» — 20 августа 2026 г. в 08:11:33.111
«Бага наhанhаа буряад хэлэндээ дуратайб» гээд Оһын аймагай Үбэсэ нютагһаа гарбалтай Алина Халматова хэлэнэ. Энэ бэлигтэй басаганай нэрэ олондо мэдээжэ байха. Тэрэ һургуулиин сагһаа буряад хэлэн дээрэ аймагай, тойрогой олон тоото хэмжээнэй эдэбхитэй хабаадагша байһан. Тойрогой буряад хэлэнэй олимпиадын нэгэтэ бэшэ илагша болоно. Уран шүлэгүүдые багаһаа зохеодог, соелой болон тамирай урилдаануудай лауреадай нэрэ зэргэнүүдтэ хүртэһэн, алишье талаараа бэрхэ, шадамар юм. Мүнөө Алина Халматова Буряадай гүрэнэй ехэ һургуулиин «Ород хэлэн, ород литература, буряад хэлэн, буряад литература» гэһэн хоёр профильтай багшанарай һуралсал гэһэн шэглэлээр 4-дэхи курсын оюутан. - Бага наhанhаа тайзан дээрэ наадаха, шүлэг уншаха, буряад хэлэн дээрээ дуу дуулаха дуратайб, түрэлхи хэлэндээ ехэ дуратайб, аба эжымни намда хэлэндээ дурлал хүмүүжүүлhэн, бага наhанhаа намайе элдэб мүрысөөнүүдтэ эльгээhэн эжы Хамгушкеева Анна Геннадьевна, эхин классай багша Халматова Инна Иннокентьевна, түрэлхи хэлэнэй уран зохеолой багша Шадаева Таисия Григорьевна, Буряад арадай аман зохёолой кружогые даагша Башлеева Светлана Ивановна, «Обусинские напевы» ансамблиин хүтэлбэрилэгшэ Ильина Алена Ивановна, хореограф Халматова Юлия Дмитриевна, «Сэдьхэл» кружогой хүтэлбэрилэгшэ Балданова Серафима Николаевна гэгшэд эрдэм мэдэсэеэ ба бэлиг шадабарияа намда дамжуулаһандань аргагүй баясанаб. Һургуулиин жэлнүүдэй туршада хэлэнэй, соёл заншалай һайханиие бэе дээрээ үзэһэн байнаб. Би аха нүхэдэйнгөө ажалые ба олоһон дүршэлөө үнэхөөрөө сэгнэнэб, - гээд залуу басаган хөөрэнө. Бүгэдэ буряадуудай Алтаргана фестивалиин бага уран зохеолой мүрысөөндэ Алина хоердохиео түрэл Эрхүү можоео нэрэ түрэтэйгөөр түлөөлһэн байна гээд онсо тэмдэглэлтэй. Монголой Булган аймагта үнгэрһэн Алтарганын мүрысөөндэ һайн бэлэдхэл харуулаа бэлэй. Эссе бэшэхэдээ эндэ ганса хурса буряад хэлэнһээ гадна өөрынгөө гүн ухаанай мэдэрэл, һанамжа, гүнзэгы бодолнуудые харуулха хэрэгтэй бшуу даа. Энэ жэлдэ Буряад Уласта үнгэрһэн Алтарганада Алина Халматова мүн лэ хабаадажа, лауреадай үндэр нэрэ зэргэдэ хүртэбэ. Эндэ Буряад ороной аймагуудай, Агын тойрогой, Монгол ороной буряад хэлэеэ үндэр хэмжээндэ мэдэхэ, уран гое, баян хэлэтэй эгээл эрхим залуушуул сугларһан юм. Эссе мүрысөөнэй түрүүн мэдэгдээгүй сэдэбтэ гуша минутын туршада гол удхыень тайлбарилха гээшэ хүнгэн бэшэ ха юм. Зүгөөр манай хабаадагша урилдаанай хоер шатые дабажа, бусадһаа дутахагүй хүдэлмэри бэшэһэн байна. Энэ илалта минии багшанарай, гэртэхидэй хамтын илалта болоно гээд Алина тоолоно. Уянгата һайхан түрэл хэлэеэ улам гүнзэгыгөөр шудалжа, ерээдүйдөө бэрхэ мэргэжэлтэн болохыень Алина Халматовада хүсэнэбди! Подписаться