Шагай наадан гое даа!
Шагай наадан гое даа! Манай Усть-Ордын буряадай тойрогто шагай наадан һүүлэй жэлнүүдтэ hэргээгдэжэ байна. Шагай наадан – үрэжэл, мал ажал һүлдэ тэмдэглэһэн буряад заншалта наадан болоно. Олон зуугаад жэлэй саана бии болоhон энэ наадан мүнөө хүрэтэр үлэһэн юм. "Шагай наадан" ЮНЕСКО-гой материальна бэшэ соёлой баялигуудай жагсаалтада оруулагданхай. Округой ажаhуугшад энэ наадантай һайн танил. Мүрысөөнүүдтэ ямаршье наһанай хабаадагшад ерэжэ, элдэб наһанай бүлэгүүдтэ наададаг. Баяндай аймагай Гаханай дунда һургуулида Шагай нааданай кружог дүрбэдэхи жэлээ ябуулагдана. Нэмэлтэ һуралсалай багша Вера Урбаевагай хүтэлбэрилгэ доро ехэ багагүй энэ урданай нааданда һурана. Тэдэнэр аймагай, тойрогой мүрысөөнүүдтэ шанга һууринуудые эзэлнэ. - Шагай наадан шухала шанарнуудые хүгжөөдэг. Энэ нааданда тэсэбэритэй, шуран,хурдан болонобди,- гээд 8-дахи ангиин һурагша Анжелика Алдырова хэлэнэ. Энэ һарада Түнхэнэй аймагта үнгэрһэн "В сердце Саянских гор" гэһэн регион хоорондын этнокультурна фестивальда өөрынгөө наһанай шатада "Няһалалга" зүйлдэ Валерия Шалбаева хүндэтэй 3-дахи һуури эзэлбэ. "Табаасай" нааданда Виктор Сахаев мүн лэ гурбадахи призер болоо. Харин Евгения Шалбаева дүрбэдэхи һуури эзэлбэ. Гаханай үхибүүд Усть-Ордын тойрогой командада энэ нэрэтэй мүрысөөндэ ехэ хубитаяа оруулба. Буряад нааданда ябадаг эдэ һурагшад бусад үхибүүдтэ мэдэсэеэ хубаалдажа, арадайнгаа еһо заншал сахина гээшэ. Подписаться