"Алтаргана-2026" гэһэн Уласхоорондын буряад арадай XVI нааданай "Нангин бууса" гэһэн бу...
"Алтаргана-2026" гэһэн Уласхоорондын буряад арадай XVI нааданай "Нангин бууса" гэһэн буряадуудай ажабайдал, хүтэлбэри эмхидхэхэ талаар эрхим дүй дүршэлнүүдэй харуулга гэһэн мүрысөөнэй илагша Оһын аймагай Үлеэ нютагай Максимовтанай гэр бүлын ажахы болоно. Гэрэй эзэн Владимир Германович бага наһанһаа таряашанай ажал хүдэлмэриин сэнтэйе ойлгожо абаһан — мүнөө хадаа харюусалгатай байдалай эдэ хэшээлнүүдынь таряашанай хэрэг эрхилэлгын үндэһэ һуури болонхой. Хажуудань найдамтай түшэг нүхэрынь Наталья Николаевна болоно. Тэдэнэр хамтадаа бата бэхи, айл аймагтаа хүндэтэй гэр бүлэ байгуулһан. Угайнгаа хэр угhаа хойшо сахижа ябаhан захяа заршам, байдал уhанда хаяагүй. Тэдэнэр тоонто нютагаа хооhоруулаагүй, түрэл дайдаяа адуу малаар бүрхөөжэ, буряад заншалаа алдаагүй ажаһууна. Владимир Максимов булагад гарбалтай, онхотой яҺанай буряад хүн. Герман Александрович болон Дора Владимировна Максимовтанай үнэр баян гэр бүлын ууган хүбүүниинь юм. Бага наҺанҺаа хүдөөгэй хүнгэн бэшэ ажалай амта таниһан, үхэр хонидоо адуулжа, түрэлхидтөө туhалдаг байгаа. Томо болоходоо аба эжынгээ тэжээжэ байhан мал үсхэбэрилжэ, өөрынгөө хүсэ шадалаар ажалаа ябуулжа эхилһэн. Урданай "мал хаража, ама тоhодохо "гэhэн сэсэн үгэ үнэн байгаа бшуу. 2008 ондо Владимир Германович хүдөө ажахын хэрэг эрхилхэ гэжэ хүдэлмэриеэ захалаа. - 84 га газарһаа, арбан толгой үхэрһөө эхилээб. Мүнөө дээрээ ёргоон зуун га газартайбди, хоёр зуун наян ёргоон толгой үхэрнүүд бии, зуун далан дүрбэн толгой морид, ажалшад хоёр дахин олон болоо. Түрүүшын ел ехэ хүндэ, хатуу байгаа. Хүдөө ажахыда хэрэгтэй үнэтэй трактор гэхэ мэтые банкһаа кредит абажа худалдажа абаабди. Мүнөө дээрээ гүрэнэй тэдхэмжэ ехэ һайн болоо: лизингын ашаар шэнэ текникэтэй болообди, дүшэн толгой үүлтэртэ үхэр мал Агаһаа асараабди. Үшөө тиихэдэ таряа тарижа хуряадагбди. Тээрмэ бии, үхэр малай хоол бүридхэдэг цех. Хүдөө ажахы хүгжөөхэ гээшэ өөрын онсо гуримтай. Ямар уларил тогтоогдоноб, хэр һайн ургаса урганаб, амитад хэр зэргэ үбэлжэнэб, зуһанаб гэхэ мэтэ олон зүйлнүүдһээ дулдыдадаг. Техникын сэн хүндэрнэ, бензин, тоһон гэхэ мэтэ. Мүнөө сагта Һайн, бэрхэ, харюусалгатай ажалшадшье тон үсөөн. Гэбэшье эгээ эхинһээ намтай хүдэлһэн нэгэ хэды хүнүүд бии. Дүрбэн ажалшадтаа гэрнүүдые бодхоожо үгөөб,- гээд Владимир Германович хөөрөө һэн. Мүнөө Максимовтанай үмсын ажахы асари томо, hүрэг адуу моридтой, олон бодо малтай болонхой. Борис хүбүүниинь Эрхүү хотын Байгалай гүрэнэй ехэ һургуули дүүргэжэ, экономист мэргэжэлтэй болоһон. Хэдэн жэлэй саана хүдөө ажахы эрхилжэ, абынгаа харгы шэлэһэн байна. Ехэ басаган Нина Эрхүүгэй гүрэнэй хүдөө ажахын ехэ һургуулида һурана, хажуугаарнь Бори ахадаа бухгалтераар ажаллана. Эгээ бага Анита басаганиинь Эрхүүгэй олимпиин резервын училищада һурана. Бүхэ барилдааша басаган, Эрхүүгэй можодо олон удаа илагша болоо, Россиин чемпионадай шанда хүртэһэн байна. Гэр бүлын саашанхи хүдөө ажахын түсэб гэхэдэ, уһанай хангамжа, газар орошолгын зүйлнүүдые нэбтэрүүлжэ, трактор, комбайн гэхэ мэтые һайжаруулха хүсэл байна. Һайн, эдеэшэтэй ургаса хуряажа, уларилай шэнжэнүүдые үзэжэ шададаг болоо һаа, бүхэли хоног хорин дүрбэн саг ажалаа ябуулхаар бэлэн. Үхэр малай, моридой шанарыень һайжаруулжа, шэнэ үүлтэртэ адаһа мал хаража эхилхэ мүн лэ хүсэлтэй. - Хүдөө ажахыда ажал хэхэ һанаатай хүнүүдтэ юун гэжэ хэлэхэеэ һанаатайбди гэхэдэ, юумэнһээ зүрхэ алдангүй, туршаха хэрэгтэй, - гээд Максимовтанай гэр бүлэ тоолоно. Подписаться