Ааҕар балаҕаҥҥа «Эдэр экологтар» ыалдьыттаатылар. — 5 июня 2026 г. в 03:44:40.569
Ааҕар балаҕаҥҥа «Эдэр экологтар» ыалдьыттаатылар. Бүгүн, бэс ыйын 5 күнэ – Аан дойдуга тулалыыр эйгэни харыстааһын күнэ, оттон Арассыыйаҕа Эколог күнэ! Бу күнү 2007 сылтан бэлиэтиибит. Бу күн сүрүн соругунан буолар дьон болҕомтотун айылҕаҕа, экологическай кыһалҕаларга тардыы. Тулалыыр эйгэ бу биһиги дьиэбит, олохпут тирэҕэ. Кини ыраас буоллаҕына, биһиги доруобуйабыт бөҕө, олохпут чөл буолар. Айылҕаны харыстааһын бу биһиги ытык иэспит эрэ буолбакка, кэлэр көлүөнэбит иннигэр эппиэтинэспит. Биһиги айылҕаҕа хайдах сыһыаннаһарбыт кэлэр кэммит хайдах буолара тутулуктаах. Хас биирдии киһи бу күн бэйэтин кылаатын киллэриэн сөп. Киһи барыта бэйэтин кылаатын киллэрдэҕинэ, айылҕабыт чэлгийиэҕэ, кэлэр кэскилбит сырдыгынан туолуоҕа. Айылҕаҕа харыстабыллаахтык сыһыаннаһар бу дьиҥнээх саха киһитин дьоһун быһыыта. Бу бэлиэ күн айылҕабытын өссө истиҥник саныырга көҕүлээн улуустааҕы О.Д.Федорова аатынан киин библиотека иһинэн үлэлиир экология киинэ олохтоохтору айылҕаны харыстыыр аахсыйаҕа ыҥырбыта. Бу аахсыйаҕа Д.С.Спиридонов аатынан улуустааҕы гимназияттан «Юнармеец» лааҕыр, салайааччы Борисов Егор Борисович, Н.И.Бойлохов аатынан оҕо искусство оскуолатыттан «Сааскылаана» лааҕыртан «Лира» хор этэрээтэ, салайааччылар Бугулова Нюргустана Даниловна, Петрова Марина Георгиевна, «Тускул» оҕо кииниттэн «Мастерилка» лааҕыр, салайааччы Васильева Туйаара Васильевна уонна Ю.Н.Прокопьев аатынан спортивнай орто оскуолаттан «Айар чөмчүүк» фольклорнай лааҕыр, салайааччы Тюкянова Ульяна Егоровна кыттыыны ыллылар. Кэлбит хас биирдии оҕолор «Эдэр экологтар» диэн библиотечнай уруокка кыттан сэргэхсийдилэр. Тэрээһин түмүгэр минньигэс бэлэх тутан олус астынан тарҕастылар. Хас биирдии күҥҥэ айылҕабытын саныаҕыҥ, харыстыаҕыҥ!