⚜️⚜️⚜️⚜️⚜️⚜️⚜️⚜️⚜️⚜️
⚜️⚜️⚜️⚜️⚜️⚜️⚜️⚜️⚜️⚜️ Кэбээйигэ уһун тыыннаах олоҥхо ааҕыыта – үйэлээх үгэс сүрэххэ иҥэр. Кэрэ айылҕалаах Кэбээйи сиригэр XIX өрөспүүбүлүкэтээҕи Олоӈхо ыһыаҕын бастакы күнүгэр ыытыллыбыт "Олоӈхо уһун тыыннаах ааҕыыта" үрдүк таһымнаахтык түмүктэннэ. Бүгүн саха тылынан 45 кыттааччы республика араас муннугуттан кэлэн аахтылар. Онтон сарсын 10 чаастан сахалыы эрэ буолбакка, нуучча уонна эбээн тылынан ааҕыахтара. Бу кэрэхсэбиллээх бырайыак автора киэн туттар биир дойдулаахпыт, Саха Өрөспүүбүлүкэтин култууратын үтүөлээх үлэһитэ, Саха Өрөспүүбүлүкэтин култууратын туйгуна, Үөдүгэй нэһилиэгин бочуоттаах олохтооҕо Наталия Кирилловна Петрова буолар. Кини көҕүлээһининэн 2022 сылтан, Үөһээ Бүлүүгэ ыытыллыбыт Олоҥхо ыһыаҕыттан саҕалаан, бу тэрээһин бастакытын республиканскай таһымӈа ыытыллыбыта. Ол иннинэ бу бырайыак улуус таһымнаах үгэс буолан ыытыллар этэ. 2022 сылга «Олоӈхо уһун тыыннаах ааҕыыта» бырайыак чэрчитинэн «Дьулуруйар Ньургун Боотур» олоҥхону 100 киһи мустан, биир кэлим утуу-субуу аахпыта. Бу маннык түгэн Олоҥхоҕо тапталы, төрүт тылга сүгүрүйүүнү өссө күүһүрдэр. Бу ситиһии кэнниттэн бырайыак өрөспүүбүлүкэ таһымыгар тахсыбыта. Ол курдук, 2023 сылга Өймөкөөн улууһугар, 2024 сылга Аммаҕа, 2025 сылга Саха Сирин соҕуруу өттүгэр, Нерюнгрига библиотека үлэһиттэрэ тиийэн биир идэлээхтэрин кытта бу сүдү тэрээһини ыыппыттара. «Олоӈхо уһун тыыннаах ааҕыыта» көннөрү ааҕыы буолбатах. Кини хас биирдии саха ыалын дууһатын, сүрэҕин ыраастыыр, төрүт үгэскэ бэриниини, тапталы иҥэрэр, өбүгэбит муудараһын кэлэр көлүөнэҕэ тиэрдэр улахан үлэ. Олоҥхо көннөрү тыл буолбатах, бу ытык өйдөбүл, саха кутун-сүрүн быстыспат сорҕото. Маннык бырайыактар норуот биир сомоҕо буоларыгар, кини духуобунай күүһүн бөҕөргөтөргө, төрүт тылы, култуураны харыстыырга улахан оруолу оонньуур. Норуот үйэлээх баайа, өбүгэлэрбит сүдү айымньыта Олоҥхо, аныгы кэмҥэ саҥа күүһүн, тыынын ылан V төгүлүн ыытыллар үбүлүөйдээх "Олоӈхо уһун тыыннаах ааҕыыта" түһүлгэҕэ кэлбит дьону түмэ тардыбыта кэрэхсэбиллээх. Саха норуота баарын тухары Олоҥхобут тыыннаах буолуоҕа!