Бүгүн О. Д. Федорова аатынан киин модельнай библиотека түһүлгэтигэр "Ийэкээм сыдьаайар ...
Бүгүн О. Д. Федорова аатынан киин модельнай библиотека түһүлгэтигэр "Ийэкээм сыдьаайар сырдыга..." диэн ааттаах истиӈ көрсүһүү буолла. Саха сиригэр Ийэ күнэ сыл аайы алтынньы ый үһүс баскыһыанньатыгар, СӨ бэрэсидьиэнин 1993 сыл балаҕан ыйын 2 күнүнээҕи ыйааҕынан бэлиэтэнэр. Бүгүӈӈү үөрүүлээх күҥҥэ киин библиотекаҕа Саха Өрөспүүбүлүкэтин Ийэлэрин күнүн көрсө *«Ийэкээм сыдьаайар сырдыга..»* диэн ааттаах бырааһынньыктааҕы истиҥ сэһэргэһии буолла. Бу тэрээһин Герой ийэ, салайааччы, учуутал Ксения Илларионовна Жиркова төрөөбүтэ 100 сылын чэрчитинэн ыытылынна. Бу үтүө көрсүһүүгэ Ксения Илларионовна төрөппүт кыргыттара Раиса Дмитриевна Спиридонова, Лидия Дмитриевна Лыткина уонна сиэнэ Бүлүү куоратын мэрэ Ян Анатольевич Попов олус истиӈник ийэлэрин, эбээлэрин туһунан кэпсээтилэр. Маны тэӈэ улуус дьаһалтатын ыччат уонна дьиэ кэргэн салаатын специалиһа Зоя Моисеевна Колосова уонна үөрэх салалтатын салайааччыта Леонид Николаевич Огочонов кэлэн ийэлэри эҕэрдэлээтилэр. Уонна педагогическай үлэ бэтэрээнэ, СӨ үөрэҕириитин үтүөлээх үлэһитэ, 96 саастаах ытык киһибит Ульяна Терентьевна Тимофеева Ксения Илларионовна туһунан дьоро күн ыалдьыттарыгар үтүөкэннээх үлэтин туһунан эрэ буолбакка, элбэх оҕону сөпкө иитии-такайыы ньымалара ыараханын туһунан сэһэргээтэ. Кини дьоһуннаах олоҕун, олоххо дириҥ көрүүтүн, үтүө ыччаттары төрөтөн, иитэн таһаарбыт үтүө өрүттэрин эдэр көлүөнэ ыччаттарга, эдэр ийэлэргэ холобур оҥостон сырдатылынна. Улууспут дьоруой ийэлэрэ уонна түмсүүлээх эдэр ийэлэр оҕо, дьиэ кэргэн тула санааларын атастастылар, бэйэлэрин уопуттарын үллэһиннилэр. Сэһэргэһиини Эр хоһууттарбыт соһуччу ырыаларын бэлэхтээн өссө истиҥ уонна үөрүүлээх оҥордулар. Киин библиотека үлэһиттэрэ бу күн иитинэн ыарахан балаһыанньаҕа түбэспит ийэлэргэ анаан сылын аайы ыытыллар *«Үтүө дьыала полката»* аахсыйаны быйыл даҕаны тэрийдилэр. Бу сырыыга эмиэ туора турбакка, ис санааларыттан оҥоһуллубут бородуукталары, таҥаһы-сабы уонна канцелярскай сээкэйдэри хомуйан, ийэлэргэ бэлэх ууннулар. Бу тэрээһин Ийэ күнүн суолтатын өссө күүһүрдэн, ийэлэрбитигэр махталбытын уонна ытыктабылбытын биллэрэр, ону сэргэ дьону үтүө дьыалаҕа ыҥырар улахан суолталаах диэн бэлиэтэннэ.