Октябрь 10-да Кызыл кожууннуң Баян-Кол сумузу 100 чыл оюн демдеглеп эрттирген. Тыва Рес...
Октябрь 10-да Кызыл кожууннуң Баян-Кол сумузу 100 чыл оюн демдеглеп эрттирген. Тыва Республиканың Дээди Хуралының Даргазы Кан-оол Давааның даалгазы-биле депутат Буян Биче-оол тыва парламентиниң байыр чедириишкинин чыылганнарга таныштырган. Ында мындыг одуруглар бар: «Баян-Кол ажыл-ишчи кижилерниң чурту. Төрээн черин алдаржыткан баян-колчулар база эвээш эвес. Бай-Кара Шөжүлбеевна Долчаңмаа Тывага херээженнер шимчээшкининиң тургузукчуларының бирээзи. Ол Тыва АССР-ниң Дээди Совединиң дөрт чыыжының Президиумун улаштыр даргалаан. Билдингир тыва чогаалчы Байкара Дамчаевич Хөвеңмей – Баян-Кол сумунуң оглу. Ол тыва уран чогаалга фантастика темазын оттурган. Өскен-төрээн черин алгап-мактаан чүс-чүс шүлүктери болгаш чечен чугаалары тыва литератураның төөгүзүнде мөңге арткан». Буян Биче-оол сумунуң бөлүк чурттакчыларынга Дээди Хуралдың шаңналдарын тывыскаш, баян-колчуларга кадыкшылды, аас-кежикти, бурунгаар чиге көрүштү, тура-сорукту болгаш чедиишкиннерни күзээн.