Үтүө ыалдьыт – билиигэ уонна саҥа саҕахтары арыйыыга тирэх — 11 апреля 2026 г. в 06:18:55.610
Үтүө ыалдьыт – билиигэ уонна саҥа саҕахтары арыйыыга тирэх Николай Гаврилович Чернышевскай аатынан Бүлүүтээҕи профессиональнай-педагогическай колледжка педагогика наукатын дуоктара, профессиор, академик, Саха Өрөспүүбүлүкэтин Наукатын академиятын Төрөөбүт тылы чинчийэр, харыстыыр уонна сайыннарар киин салайаачыта Феодосия Васильевна Габышева ыалдьыттаата. Феодосия Васильевна бу сырыыта колледж олоҕор суолталаах түгэн буолла. Ыалдьыт 2025-2026 үөрэх дьылыгар «Профессионалитет» федеральнай бырайыак чэрчитинэн, Россия Илин сайдыытын министиэристибэтин өйөбүлүнэн аһыллыбыт коррекционнай педагогика уонна эбии үөрэхтээһин педагогикатын салааларыгар саҥа мастарыскыайдарыгар сырытта. Бу күннээх көрсүһүүгэ Феодосия Васильевна салаа уһуйааччыларын кытта идэлээх санаа атастаста. Сүрүн болҕомто – төрөөбүт тылы харыстааһыҥҥа уонна сайыннарыыга, доруобуйаларыгар хааччахтаах оскуола иннинээҕи уонна алын сүһүөх оскуолатын оҕолорун үөрэтиигэ, ону тэҥэ саҥа мастарыскыайдарга көрүллүбүт методическай матырыйаалы дьоҥҥо-сэргэҕэ туһалаахтык туһаныыга туһуланна. Салгыы Феодосия Васильевна төрөөбүт тылы, литератураны үөрэтиигэ көхтөөхтүк дьарыктанар алын сүһүөх учууталларын бэлэмниир салаа устудьуоннарын уонна преподавателлэрин кытта истиҥник кэпсэттэ. Бэлиэтээн эттэххэ, быйылгы үөрэх дьылыгар колледжка саха тылын уонна литературатын үөрэтэр анал бырааптаах начаалынай кылаас учууталларын бэлэмниир бөлөх аһыллыыта үрдүкү таһымнаах үлэ саҕаламмытын туоһулуур. Устудьуоннар колледж иһинээҕи эрэ үлэни буолбакка, оскуола иннинээҕи саастаах оҕолорго, алын сүһүөх үөрэнээччилэргэ анаммыт төрөөбүт тылы сайыннарар, регион култууратын байытар уонна норуот баай нэһилиэстибэтин үөрэтиигэ анаммыт саҥа, интэриэһинэй бырайыактарын көрдөрдүлэр. Федосия Васильевна устудьуоннар саҥаны айар дьоҕурдарын үрдүктүк сыаналаата, алгыс тылларын этэн, инникитин таһаарыылаахтык үөрэтэллэригэр уонна идэлэригэр бэриниилээх буолалларыгар баҕа санаатын тириэртэ. Феодосия Васильевна сырыытын биир сүрүн сыалынан колледж педагогическай коллективын кытта киэҥ хабааннаах көрсүһүү буолар. Манна төрөөбүт тылынан үөрэтиигэ туруоруллубут боппуруостар, сонун идиэйэлэр уонна инники былааннар ырытылыннылар. Бу көрсүһүү колледж салайааччыларыгар уонна үлэһиттэригэр саҥа күүһү-уоҕу биэрдэ, төрөөбүт тылбыт кэскилин түстүүргэ өссө төгүл кытаанах санааны үөскэттэ