Исидор Бараахап аатынан №1 орто оскуолаҕа Билии күнэ үрдүк таһымнаахтык ыытылынна🥳🥳🥳
Исидор Бараахап аатынан №1 орто оскуолаҕа Билии күнэ үрдүк таһымнаахтык ыытылынна🥳🥳🥳 Бүгүн, Балаҕан ыйын 1 күнүгэр, Исидор Бараахап аатынан №1 орто оскуолаҕа үөрэх саҥа сылын арыйар үөрүүлээх тэрээһин, Билии күнэ, буолла. Айылҕабыт күнэ-дьыла да оһуобайдык туран биэрэн, бары кэлбит дьону үөртэ. Тэрээһин сүрүн чааһа оскуола боруогун атыллаабыт бастакы кылаас оҕолорун парадтаан киириилэриттэн саҕаланна. Барыта холбоон 50 оҕо үөрэнээччи үрдүк аатын сүгэр дьоллоох түгэнэ буолла. Кинилэри 1 "А" кылаас салайааччыта Надежда Ивановна Сантаева уонна 1 "Б" кылаас салайааччыта Наталья Матвеевна Васильева илиилэригэр туттулар. Бу кырачаан оҕолору оскуола истиҥник көрсөн, олохторун саҥа кэрчигин арыйдылар🥳🥳🥳 Үөрүүлээх тэрээһини оскуола 50 сыллаах кыһыл көмүс выпускниктара кэлэн киэргэттилэр. Кинилэр парадтаан киириилэрэ дьон-сэргэ болҕомтотун уонна кэрэхсэбилин тарта. Билиҥҥи үөрэнээччилэргэ эҕэрдэ тылларын анаатылар. Тэрээһиҥҥэ ыҥырыылаах ыалдьыттарынан буоллулар: Үөһээ Бүлүү улууһун баһылыгын солбуйааччы Егор Дмитриевич Иванов, улуустааҕы үөрэх салалтатын аатыттан начальнигы иитэр үлэҕэ солбуйааччы, Анал байыаннай дьайыы бэтэрээнэ Айал Трифонович Мохначевскай, Бүлүүтээҕи көрдүүр-быыһыыр этэрээт начальнига, анал байыаннай дьайыы бэтэрээнэ Михаил Васильевич Ан. Кинилэр бары үөрэнээччилэри үөрэх саҥа сылынан эҕэрдэлээн, саҥа ситиһиилэри баҕардылар. Оскуола директора Васмар Анастасьевич Руфов дьоһуннаах тыл этэн, барыларын алҕаата. Үгэс быһыытынан, Россия уонна Саха сирин былааҕын таһаарыы үчүгэй үөрэхтээх активист оҕолорбутугар Федоров Андрейга уонна Тарасов Тимурга чиэстэннэ. Бастакы чуорааны 1 "А" кылаас үөрэнээччитэ Сергеев Чаҕыл кинини сиэтэн киирбит 11 кылаас туйгун үөрэнээччитэ, Республиканскай "Молодые профессионалы" призера Николаева Мариялыын доргуччу тыаһаттылар. Ону тэҥэ 1 "Б" кылаас үөрэнээччитэ Кобякова Милена кинини көтөҕөн киирбит хас да төгүллээх мас тардыһыыга Республика уонна Россия Кыайыылааҕа Саввинов Саянныын бу чуорааны дьиэрэттилэр. Бу бэлиэ түгэн оскуола уонна саҥа үөрэнээччилэр икки ардыларыгар ситим быатын тардыллыбытын көрдөрдө. Үөрүүлээх тэрээһини 6 "А" кылаас оҕолоро оскуола гииминин ыллаан киэргэттилэр. Ону таһынан үгэскэ кубулуйбут Баҕа санаа самолетун выпускниктарга бэлэх ууннулар. Кырачаан бастакы кылаастар ыллаан-хоһоон ааҕан, кэлбит дьон кэрэхсэбилин ыллылар. Бу күн Исидор Бараахап аатынан №1 орто оскуолаҕа билии кыһатын аартыга аһылынна. Саҥа үөрэх сылыгар бары үөрэнээччилэргэ уонна учууталларга ситиһиилэри, билиигэ тардыһыыны, айар дьоҕуру баҕарабыт!🥳🥳🥳