Ыспааһаптар - атырдьах ыйын бэлиэ күннэрэ — 13 августа 2026 г. в 04:41:12.024
Ыспааһаптар - атырдьах ыйын бэлиэ күннэрэ Атырдьах ыйын 14 күнэ - Бастакы Ыспааһап. Бу күн хотуур ортото, анды оҕото ситэр, ыҥырыа мүөт таһаарара уурайар. Түүн сылаас буоллаҕына күһүн уһуур, Ыспааһаптар ардахтара түһэн саҕалыыллар, айылҕаҕа күһүн тыына биллэн барар. Атырдьах ыйын 19 күнэ - Иккис Ыспааһап. Бастакы хаһыҥнар түһэллэр, оҕуруот аһа хомуллар, сайылыктан кыстыкка көһүү кэмэ саҕаланар. Бу күн күннээх буоллаҕына күһүн кураан буолар. Кус-хаас соҕуруу көттөҕүнэ кыһын эрдэ кэлэр. Аан Дьааһыҥҥа сиэр-туом оҥоһуллар. Атырдьах ыйын 29 күнэ – Үһүс Ыспааһап. Туруйа соҕуруу көтөр. От үлэтэ түмүктэнэр. Ый бүтүүтэ тыал түһэр, оту-маһы куурдар, хас эмэ хонуктаах ардахтар түһэллэр. Үһүс Ыспааһап кэнниттэн эһиилги сыл үчүгэй үүнүүлээх буолар буоллаҕына от кэнчээрилиир. Атырдьах ыйа ардахтаах буоллаҕына кыһын сылаас буолар. Хаартыскаҕа: Саха музейын фондатыттан “Үйэлээх халандаар”. Православнай халандаар бэлиэ күннэрин батыһан оҥоһуллубут күн-дьыл хаамыытын, олох-дьаһах тэрээһинин көрдөрөр XIX-XX үү. халандаар. #ЯкутскийМузей #СахаМузейа