Күһүҥҥү долгураҥ Сайалыын🍂
Күһүҥҥү долгураҥ Сайалыын🍂 Дьокуускай куорат күнүн чэрчитинэн Саха музейыгар Саха норуодунай суруйааччытын, тапталлаах бэйиэппитин, Саха телевидениетын биллэр редакторын, ыытааччытын Наталья Владимировна Михалева-Сайаны кытта көрсүһүү буолан ааста. Наталья Владимировна саха литературатыгар дьахтар поэзиятын иккис көлүөнэтин биир чаҕылхай сулуһа буолар, дьахталлартан иккиһинэн Саха норуодунай суруйааччыта аатын иҥэриллибитэ. Саха телевидениетыгар республикабыт ситиһиилээх, бар-дьон туһугар улахан кылааты киллэрбит дьонун, Сахабыт сирин историятын, баай культуратын туһунан ыытар биэриилэрин бары сөбүлээн көтүппэккэ көрөбүт. Саха музейа Наталья Владимировнаны кытта ыкса доҕордоһор, улахан тэрээһиннэрбит, быыстапкаларбыт кинитэ суох ааспаттарын таһынан музей фондатын үйэлээх малларын историятын устан дьоҥҥо-сэргэҕэ кэпсиир. «Күһүҥҥү долгураҥ» Саха музейыгар хайдах ааспытын туһунан Сайа постуттан үллэстэбит: «Дьон куорат күнүн элбэх тэрээһиниттэн ордорон суруйааччылыын көрсүһүүгэ кэлэллэрэ – өй-санаа дьадайа илигин чаҕылхай туоһута буолар.Көрсүһүүгэ кэлбит дьон - кинигэни таптыылларын таһынан ийэ тылбыт төлкөтүгэр ыалдьар, тус бэйэлэрэ санаалаах, этиилээх дьон эбиттэр. Онон кэпсэтии сытыырхайан да ылар түгэннэрдээх буолла. Урут "Кэпсиэ" биэриибэр кыттыбыт, 1994 с. ТЫЛЛЫЫ кинигэм сүрэхтэниитигэр сылдьыбыт, УЙГУРУ долгуйа аахпыт, бэйэлэрэ айар-суруйар суолу солуу сылдьар дьону сэргэ ыраах Анаабыртан кэлэ сылдьар куорат ыалдьыттарыгар тиийэ билэр-билбэт дьонум сэргэхсийбит сирэйдэрэ-харахтара - бу быйылгы күһүҥҥү долгураҥым иэйиилээх көстүүтэ буолан өйбүн-сүрэхпин өрүкүттэ».