Саха Өрөспүүбүлүкэтин Судаарыстыбаннаһын өрөгөйдөөх күнүгэр - балаҕан ыйын 27 күнүгэр Ү...
Саха Өрөспүүбүлүкэтин Судаарыстыбаннаһын өрөгөйдөөх күнүгэр - балаҕан ыйын 27 күнүгэр Үрдүк Чөркөөххө бэлиэ күн ааста Бу күн СӨ Бырабыытылыстыбатын бэрэссэдээтэлин солбуйааччыта А.А.Семенов, Таатта улууһун баһылыга А.С.Бурцев, Ил Түмэн дьокутаата П.Д.Рахлеев, Октябрьскай нэһилиэк баһылыга О.Н.Ушницкай Саха сиригэр Судаарыстыбаннаһы олохтообут Былатыан Ойуунускай төрөөбүт алааһыгар сүгүрүйэн аастылар. Үөрүүлээх миитиҥҥэ Ил Дархан махтал суругунан Таатта улууһун баһылыга А.С.Бурцев, Арассыыйа Президенин Уһук Илин федеральнай уокуругар боломуочуйалаах бэрэстэбиитэлин солбуйааччы Григорий Куранов махтал суругунан олохтоох Казачество салайааччыта И.Ф. Рахлеев наҕараадаланнылар. Ыалдьыттар Былатыан Ойуунускай төрөөбүт балаҕаныгар аал уоту аһатан алгыс ыллылар. Манна бу дьыл балаҕан ыйын 15 күнүгэр П.А.Ойуунускай төрөөбүтэ 135 сылын көрсө анал Быраабытылыстыбаннай хамыыһыйа тэриллибитин туһунан улуус баһылыга Айаал Семенович иһитиннэрдэ. Салайааччы Анатолий Аскалонович П.А.Ойуунускай "Сүүс сыллаах улуу былаан" (оҥоһуллан эрэр олоҥхо), А.Е.Кулаковскай - Өксөкүлээх Өлөксөй "Ойуун түүлэ" айымньылара инники норуоппут сайдарыгар тирэх буолалларын долгуйан туран бэлиэтээтэ. Ойуунускай дойдутугар - Ытык Таатта сиригэр ыалдьыттар күүс-уох ылан, өй-санаа эбинэн бардылар.