Өрөспүүбүлүкэбит 2028—2029 сс. барыллаан оҥоһуллар 2027 с. бүддьүөтүн бастакы ааҕыыта ...
Өрөспүүбүлүкэбит 2028—2029 сс. барыллаан оҥоһуллар 2027 с. бүддьүөтүн бастакы ааҕыыта түмүктэннэ. Бүддьүөппүт сүрүн көрдөрүүтэ маннык: дохуоппут 337,6 млрд солк буолара сабаҕаланар, ороскуот – 340,3 млрд солк., дефицит – 2,7 млрд. Биллэн турар, билиҥҥи судургута суох кэмҥэ, бүддьүөтү тыырыллыыта уустуктардаах. Ол да буоллар, үгэс курдук, бүддьүөппүт социальнай хайысхата кубулуйбат. Социальнай-культурнай эйгэҕэ 135,4 млрд солк., региональнай нацпроектарга – 49,4 млрд солк. (онтон 38,1 млрд солк. – федеральнай харчы) көрүлүннэ. Ону тэҥэ, кэлэр сыл тохсунньутуттан өрөспүүбүлүкэбитигэр МРОТ 6,8%-нан улаатан, бастакы зонаҕа 72 338 солк., иккис зонаҕа 81 018 солк. буолуохтаах. СВО кыттыылаахтарын өйөбүлэ уонна социальнай мэктиэлэри толоруу – булгуччу туолуохтаах, үбэ-харчыта көрүллүөхтээх. Хайдах да балаһыанньаҕа, бүддьүөт хайаан да сайдыы суолун тутуһуохтаах, өрөспүүбүлүкэбит уратыларын учуоттаан тыырыллыахтаах. Иккис ааҕыыга туруорсуубут саамай сытыы кыһалҕаларын көрүөхтээхпит. Ол иһигэр ЖКХ межтарифнай араастаһыытын үбүлээһини, коммунальнай комплекс тэрилтэрин иһинээҕи ороскуот көдьүүһүн, уустук суоллаах-иистэх нэһилиэктэр өйөбүллэрин, уо.д.а. Култуура эйгэтин этэр буоллахха, өрөспүүбүлүкэбитигэр 11 театр, 1 циркэ, 89 түмэл, 489 сынньалаҥ киинэ, 504 бибилэтиэкэ үлэлии турар.Билигин култуура тэрилтэлэрэ бары кэриэтэ коммунальнай, хамнас, дьиэни-уоту көрүү-истии, сууйуу-сотуу, харабылы наймылаһыы төлөбүрүгэр олус улахан уустуктары көрсөн олороллор. Бу кыһалҕалары кэлэр сылга аччатар инниттэн иккис ааҕыыга хайаан да уларыйыылар киириэхтээхтэр. Биһиги сүрүн сорукпут, баар тэрилтэлэри сарбыйбакка хаалларыы! Инникитин, култуура тэрилтэлэрин үлэлэрин ис хоһоонун уонна биһиги региоммут уратыларын учуоттаан, модельнай стандартары бигэргэтиэхтээхпит. Дьэ ол кэннэ, бүддьүөттэн култуураҕа төһө үп көрүллүөхтээҕин анал чинчийии ыытан, чопчу быһааран, методика оҥоһуллуохтаах. Хас биирдии хайысхаҕа сыыппаралар, дьоммут-сэргэбит кэлэр сылларга олохторо-дьаһахтара хайдах буоларын мэктиэтэ. Онон бүддьүөтү ырытарга, бэйэ-бэйэбитин өйдөһөн, сөптөөх быһаарыныылары ылыныахтаахпыт.