"СУНТААР СОНУННАРА" официальный МАХ канал редакции
Без категории · 24 апреля 2026 г.
🔹Хас бээтинисэ аайы күүтүүлээх "Ыйыт-эппиэттиибит" рубрикабытыгар доруобуйа харыстабыл...
🔹Хас бээтинисэ аайы күүтүүлээх "Ыйыт-эппиэттиибит" рубрикабытыгар доруобуйа харыстабылыгар сыһыаннаах ыйытыыларга Сунтаар улууһун кылаабынай бырааһын солбуйааччыта Нюргустана Тимофеева эппиэттиир: ❓Клещтэн утары быһыы бэриллэр дуо? Хас быһыыны ылыахтаахпыный быһааран биэриэххит дуо? ❗️ Клещтэн утары быһыы ылар дьон 3 ревакцинацияны ааһаллар. Ол курдук, 1 быһыыны ханнык баҕарар күҥҥэ, онтон иккис быһыы 1-2 ыйынан, бүтэһик 3 быһыы 1 сылынан бэриллэр. Оччоҕо харысхаллаах буолаҕыт. Клещ элбэхтик бэлиэтэмит сиригэр айанныаххыт 2 нэдиэлэ иннинэ вакцинаны ыларгыт ордук. Улахан киһи поликлиника, оҕо детскай консультацияҕа клещтэн утары быһыыны ылыан сөп. Быһыыны саас ылар ордук. Клещевой энцефалитынан ыалдьыбыт түгэн бэлиэтэнэринэн, Сунтаар улууһа клещкэ эндемическэй оройуонунан биллэр. ❓Эндопротезированиега квотанан барарга бырайыас төлүүгүт дуо? ❗️Эндопротезированиены Дьокуускай куоракка квотанан оҥотторор буоллахтарына, үлэлээбэт пенсионерга, улэлээбэт инбэлииккэ, ону тэҥэ үлэлиир саастаах ол эрээри үлэтэ суох киһиэхэ бырайыас төлөнөр. Үлэтэ суох киһи саамай сүрүнэ дьарыктаах буолуу киинигэр учуокка туруохтаах. Ону тэҥэ, квотата Новосибирскай куоракка эбэтэр дойду атын куоратыгар көрүллүбүт буоллаҕына бырайыас Дьокуускай куораттан эрэ төлөнөр. ❓Тойбохойго саҥа балыыһа тутуллар дииллэр. Төһө иэннээх буоларый? Уонна түүҥҥү койката суох буолар дииллэр. Онон сылтаан сокращение буолар, хас үлэһит уурайар уонна ханна бараллар?Урукку детдом зданията төттөрү бэриллэр дуо? Эбэтэр балыыһатынан хаалар дуу ❗️Тойбохой балыыһата 130кв.м. иэннээх саҥа дьиэтэ быйыл үлэҕэ киириэхтээх. Күнүскү куойкалаах эрэ буолар. Федеральнай ирдэбилинэн тыа балыыһалара ( врачебнай амбулаториялар) күнүскү эрэ стационар быһыытынан үлэлиэхтээхтэр. Биир да медицинскэй үлэһит сарбыллыыга барбат. Урукку детдом дьиэтин төттөрү биэриэхтээхпит. ❓Сунтаар балыыһатыгар диализ оҥорор буолуохтара дуо? ❗️Сунтаар балыыһатыгар диализ оҥоһуллар кыаҕа суох. Бастатан туран тиэхиньиичэскэй өттүнэн эппиэттээбэппит, бары ирдэбилгэ эппиэттиир, толору хааччыллыылаах анал дьиэбит суох. Ону тэҥэ, идэлээх исписэлиистэрбит тиийбэттэр. Диализка сылдьар дьоммут үгүстэрэ куоракка көһөн эмтэниини ааһаллар. Күн бүгүн Сунтаарга аҕыйах киһи диализка сылдьар. Олус сыаналаах, импортнай тэрил, эмп ирдэнэр буолан улуус кыайан уйуммат. ❓Госуслуганан бырааска суруттарбат буоллубут дуо? Макс нөҥүө телемедицина диэн тугуй? ❗Госуслуганан бырааска суруттарыы тохтуу илик. Ону тэҥэ, макс сыһыарыы, колл центрдар нөҥүө бырааска суруттарыы эмиэ барар. Макс сыһыарыы көмөтүнэн хайдах бырааска суруттарар туһунан иһитиннэриилэри тарҕатан турабыт. Телемедицинаны больничнай лиис арыттарбыт дьон туһанар. Үгүс өттүгэр ыарыыларын чэпчэкитик аһардыбыт дьон телемедицина нөҥүө больничнайдарын саптараллар. ❓Суһал көмө массыыната төһө бириэмэнэн ыарыһахха кэлиэхтээҕий? ❗️Суһал көмө массыыната 20 мүн иһинэн ыарыһахха тиийиэхтээх диэн ыйыллар. Ол эрэн, вызов элбэх түгэнигэр киһи олоҕугар ордук кутталлаах ыарыыга урутаан тиийэллэр. Сунтаар нэһилиэгэр биир эрэ фельдшерскай биригээдэ вызовтарга сүүрэр. Онон 20 мүн. тахсаллара бааламмат. ❓Ыарыһаҕы атын балыыһаҕа ким арыаллыырый? Холобура ыарыһаҕы чугас киһитэ арыаллыан сөп дуо? Киниэхэ бырайыас төлөнөр дуо? ❗️Ыарыһах атын балыыһаҕа утаарыллар түгэнигэр кинини медицинскэй үлэһит арыаллыыр. Доруобуйа харыстабылын эрэ үлэһитигэр бырайыас төлөнөр. Онтон ыарыһах чугас аймаҕа бэйэтин баҕатынан барсарын биллэрдэҕинэ, ол киһи бырайыаһын бэйэтэ уйунар. ❓Араас ыарыынан учуокка турар ыарыһахтарга көрүллэр босхо эмптэр бэриллэллэр дуо? ❗️Сахарнай диабетынан, онкологиянан, ревматоиднай артритынан, бронхиальнай астманан, сүрэх ыарыыларынан учуокка турар ыарыһахтарга босхо көрүллэр эмптэрин биэрэ турабыт.