"СУНТААР СОНУННАРА" официальный МАХ канал редакции
Без категории · 10 апреля 2026 г.
Хас бээтиниссэ аайы тахсар "Ыйыт эппиэттиибит" рубрикабытыгар Дьарыктаах буолуу киинин ...
Хас бээтиниссэ аайы тахсар "Ыйыт эппиэттиибит" рубрикабытыгар Дьарыктаах буолуу киинин салайааччыта Борис Уларов "Сунтаар сонуннарын" редакция ааҕааччыларын ыйытыктарыгар хоруйдуур. ❓Сарбыллыыга түбэстэхпинэ тутатына дьарыктаах буолуу киинигэр учуокка турабын дуо? ❗Сарбыллыыга түбэспит киһи уурайыыга бирикээһэ тахсыбытын күнүттэн 14 күн иһигэр дьарыктаах буолуу киинигэр учуокка туруохтаах. ❓Ааспыт өттүгэр үлэ дьаарбаҥката улууспутугар мэлдьи буолааччы. Ону сэргэ бырамыысыланнай тэрилтэлэр эмиэ кэлэн үлэ көрдөнөөччүгэ консультация биэрэр, ону сэргэ үлэҕэ ыларга рекомендация оҥорор этилэр. Быйыл маннык тэрээһин ыытыллыа дуо? ❗Дьарыктаах буолуу киинэ мэлдьи үлэ дьаарбаҥкатын ыытар.Ол курдук, муус устар 17 күнүгэр үлэ дьаарбаҥкатын ыытаарга былаанныыбыт. Манна оробуочай идэлэргэ наадыйар тэрилтэлэр кыттыыны ылыахтара. Алроса хампаанньа бу сырыыга кыттыбатын туһунан иһитиннэрдэ. ❓Үлэтэ суох дьону босхо үөрэтиигэ ханнык идэлэр баалларый? Онно үөрэнэргэ туох ирдэбил баарый, сааһынан хааччах баар дуо? ❗“Кадры” диэн национальнай бырайыак үлэлиир. Бу бырайыак иитинэн 70 тахса араас идэҕэ үөрэтэллэр. “Работа России” порталга киирэҥҥит "образовательные учреждения" диэн хайысхаҕа ханнык идэҕэ үөрэниэххитин баҕараргытын талаҕыт. ❓"Работа в России" сайтка ким баҕарар киирэн үлэ көрдүүр дуу эбэтэр үлэ биэрээччи эрэ ханнык ваканция баарын таһаарар дуу? ❗️Урукку курдук үлэ көрдөөн тэрилтэлэри кэрийии кэмэ ааспыта. Үлэһиккэ наадыйааччылар “Работа России” диэн биир кэлим цифровой платформаҕа вакансияларын таһаараллар. Оччотугар Арассыыйа хайа баҕар муннугар үлэни көрдүөххэ сөп. ❓Сайыҥҥы сынньалаҥ кэмигэр 15 саастаах оҕоҕо хамнаска туох үлэтэ баарый? Үлэ туһунан хантан, хайдах билсиэххэ сөбүй? ❗️Быйыл сайыҥҥы өттүгэр оҕо дьарыктаах буолуутугар диэн 200 тыһ. тахса солк. көрүллүбүтэ. Ол иһин, 20 оҕону хамнастаан үлэлэтэр соруктаахпыт. Үлэ чааһыгар Сунтаар нэһилиэгин дьаһалтытын кытары дуогабрдаһарга бэлэмнэнэбит. Сайыҥҥы өттүгэр урбаанньыттар оскуола оҕолорун эмиэ үлэлэтэр практикалара баар. Саамай сүрүнэ оҕо үлэлииргэ мотивацията улахан буолуохтаах. Үлэлиэн баҕалаах оҕолор дьарыктаах буолуу киинигэр кэлэ сылдьан ыйыталаһыахтарын сөп. Сүбэлииргэ бэлэммит.