"СУНТААР СОНУННАРА" официальный МАХ канал редакции
Без категории · 12 октября 2026 г.
#Сурутуу_2026
#Сурутуу_2026 #Акция 🔹 «Сунтаар сонуннара» 📰хаһыакка кэлэр сыл бастакы аҥаарыгар «Аҕам саастаахха хаһыатта бэлэхтээ» аахсыйа ыытылла турар. 🔹Улууспут нэһилиэктэрин тэрилтэлэрэ бу аахсыйаҕа буоларын курдук көхтөөхтүк кыттан, кырдьаҕас бэтэрээн үлэһиттэригэр, биирдиилээн дьон кырдьаҕас аймахтарыгар, махталлаах учууталларыгар, эбэлэригэр, ийэлэригэр улуустарын хаһыатын сурутан бэлэх ууналлар. 🔹Холобур, Аллыҥа нэһилиэгэр биһиги уопсастыбаннай кэрэспэдьиэммит Надежда Иванова күүстээх угуйук ыытан аахсыйаҕа кыттааччы күн аайы баар. Ол курдук, Х.Н.Николаева аатынан култуура киинин кэлэктиибэ, Виктория Иванова, Любовь Уарова, Надежда, Григорий Пинчиктар, Антонина Иванова, Хатаска олорор Ньургуйаана, Афанасий Саввиновтар Аллыҥаҕа олорор аҕам саастаахтарга улуустарын хаһыатын суруттаран кырдьаҕастары олус үөртүлэр. 🔹Күүкэй нэһилиэгэр почта суох буолан, олохтоохтор хаһыаттарын кыайан суруттарбакка хаалар түгэннэрэ баар буолааччы. Ол иһин биһиги уопсастыбаннай кэрэспэдьиэммит Светлана Попова бэйэтин баҕатынан хаһыаты суруттарыам диэн тылланан туран хаһыат сурутуутун ыыта сылдьар. Кини этэринэн, аҕам саастаахтар дэкээдэлэрин чэрчитинэн ыытыллыбыт тэрээһиҥҥэ Күүкэйдээҕи «Арассыыйа ийэлэрэ» хамсааһын икки ыалга хаһыат суруттаран биэрбит. 🔹Дьаархан нэһилиэгэ улуус хаһыатын хото суруттаран ааҕар да, араас хабааннаах сонуннарын ыытан хаһыакка, социальнай ситимнэрбитигэр таһаартарар биир көхтөөх нэһилиэк буолар. Манна биһиги уопсастыбаннай кэрэспэдьиэммит Анна Маркова өҥөтө улахан. Хаһыат ыытар аахсыйатыгар сылын аайы кытталлар. Быйыл кырдьаҕастар дэкээдэлэригэр эмиэ хаһыат суруттаран хас да киһиэхэ бэлэх ууннулар. 🔹Биирдиилээн дьон - биһиги эрэллээх ааҕааччыларбыт, доҕотторбут эмиэ аахсыйаны көтүппүттэр. Ол курдук, Кэмпэндээйи олохтоох бибилэтиэкэрэ, хаһыат уопсастыбаннай кэрэспэдьиэнэ Татьяна Местникова сылын аайы улууһун хаһыатын кырдьаҕас бэтэрээн үлэһиккэ суруттарар үтүө үгэстээх. Оттон билигин Дьокуускай куоракка олорор, үлэлиир учуутал идэлээх Андриан Максимов сылын аайы учуутал күнүн көрсө үөрэппит учууталларыгар махталын бэлиэтин улууһун хаһыатын суруттаран биэрэр. Быйыл эмиэ аан бастаан Сунтаарга эдэр исписэлиис буолан кэлбитигэр үлэ-хамнас сатабылларыгар уһуйбут учууталыгар Татьяна Божедоноваҕа «Сунтаар сонуннарын» сурутан биир идэлээҕин соһутта да, үөртэ да. 🔹Аахсыйабытын салгыы барар, тэрилтэ салайааччылара, нэһилиэк баһылыктара көхтөхтөөхтүк кыттыахтара диэн эрэнэбит. Ону таһынан бу ыйга биллэриллибит чэпчэтиилээх сурутуу бүтэрэ 4 күн хаалла. Бу хаалбыт кэми куоттарбакка, барыстаах сурутууну мүччү туппакка улууспут «Сунтаар сонуннарыгар» суруттарыҥ диэн ыҥырабыт. 📰Сурутуу сыаната алта ыйга – 812,64 солк. Оттон эрэдээксийэттэн бэйэҕит кэлэн ылар буоллаххытына сыана олох чэпчэки – 780 солк. ✍Яина ВЛАСЬЕВА https://max.ru/channel_suntaarsonunnara