💥Гриппке удур тарылга кампаниязы эгелээн
💥Гриппке удур тарылга кампаниязы эгелээн 📢Тыва Республика федералдыг акша-хөреңги-биле саткан грипп болгаш респираторлуг вирус халдавырынга удур 97 муң санныг вакцинаны алган. Бичии уруглар болгаш иштиг херээженнер, улуг назылыг кижилер, хоочураан аарыглыг кижилер, өөредилге адырының ажылдакчылары болгаш малчыннарны халас тарыырынга ниитизи-биле 158475 доза гриппке удур вакцина келгенин Тываның Кадык камгалал яамызы дыңнаткан. Тарыттырып алыры гриппке болгаш ооң нарыыдаашкыннарынга удур эң-не дээштиг арга дээрзи Кадык камгалал яамызы база сагындырган. Тарыдып алыр дизе, быжыглаттынган эмнелгезинге баар. Уруглар коллективтеринге бөлүк иммунизацияны организастаар. Ажылдаар черинче бригадаларны чалап, коллективтиң тарылгазын организастап болур. Хереглекчилерниң эргелерин камгалаар болгаш кижиниң чаагай чоруун хайгаараар федералдыг албанның Тыва Республикада эргелелиниң ажылдакчылары грипп сезону эгелевээнде, гриппке удур тарылгаларны бир дугаар салдырганнар. Ведомствонуң ажылдакчылары гриппке база ОРВИ-ге удур бөдүүн камгалал хемчеглериниң чугулазын сагындырган, чижээ, холдарны саваң-биле үргүлчү чуур, аарыг көдүрлүп келгенде, социал ырак чорукту сагыыр, хөй кижилер чыылган черлерже баарда, камгалал маскаларны кедер, ол ышкаш өрээлдерни агаарладыр, айыыл чок бактерицидтиг лампаларны ажыглаар, дезинфекциялаар холуксаалар-биле өрээлдерни аштап чуур. Росхереглелхайгааралдың Тыва Республикада эргелели 2026 чылдың сентябрь 21-ден октябрь 2-ге чедир грипп болгаш ОРВИ профилактиказының дугайында темалыг «изиг шугумнарны» хамаатыларга эрттирер. Росхереглелхайгааралдың специалистери гриппке удур каяа тарыдарын, ону канчаар шын кылырын, бистиң чуртта гриппке удур кандыг вакцинаны ажыглап турарын база ону өске тарыышкыннар-биле каттыштырып болур бе дээрзин тайылбырлаар. Эмчи масказын кажан ажыглаарын база канчаар шын кедерин, соокка алысканының кандыг демдектери-биле эмчиже баарыл дээн ышкаш айтырыгларга харыыларны бээр. Бажың иштиниң чогумчалыг температуразын, грипп үезинде уругларны канчаар камгалаарының дугайында сүмелерни бээр. «Изиг шугумнуң» телефон дугаарлары: - Росхереглелхайгааралдың чаңгыс аай консультация төвү бүдүн хүн-дүн ажылдаар: 8 800 555 49 43 дугаарже долгаары халас; - Росхереглелхайгааралдың Тыва Республикада эргелелиниң девискээрлерде эпидемиологтуг хайгаарал болгаш санитарлыг камгалал килдизиниң 8 (39422) 5-21-97 дугаарлыг телефонче 8.30 шактан 17:30 шакка чедир долгаар, дүъштеки чапсары 12.00 шактан 13.00 шакка чедир; - «Тыва Республикада Гигиена болгаш эпидемиология төвү» кадык камгалалының федералдыг бюджет албан чериниң эпидемиологтуг хайгаарал килдизиниң 8 (39422) 5-43-79 дугаарлыг телефонунче 08.30 шактан 17.00 шакка чедир долгаар, дүъштеки чапсары 12.00 шактан 13.00 шакка чедир. Күскү, кышкы, часкы үеде уруглар гриппке болгаш ОРВИ-ге алзыычал болур деп Кадык камгалал яамызы сагындырып турар. Ылаңгыя эпидемия үезинде чаа төрүттүнген чаштарже онза кичээнгейни салыр – төрелдериниң кээрин эвээжедир, а даштыыртан кирип келгеш, холдарын чугбайн, эде солуттунуп албайн, чаш төлдү көдүрүп азы куспактавас. Өг-бүлениң шупту кежигүннери хөй кижилер чыылган черлер барбазы күзенчиг. Аарывас дизе, бажың иштин үргүлчү агаарладыр. Оон ыңай өпеяаның ойнаарактарын, орун-дөжээн, идик-хевин үргүлчү чуп, кургай бээрге, изиг илиир-биле базар. А. МОНГУШ. Чурукту ТР-ниң Чазааның парлалга албанындан алган. “Шын” №37 2026 чылдың сентябрь 24