| ДҮЖҮТ АЖААЛДАЗЫ |
| ДҮЖҮТ АЖААЛДАЗЫ | 💥Ногаа байырлалдары 📢Тываның Баштыңы Владислав Ховалыгның эгелээшкини-биле республикада боттандырып турар “Өг-бүлениң шыгжамыры” деп төлевилел чурттакчы чоннуң аразында чылдан чылче калбарып турар. Эң ылаңгыя хууда ажыл-агыйлыглар, бажыңнарының чанында дузалал ажыл-агыйлыг кижилер төлевилелге идепкейлиг киржип турар. Төлевилелге киржилге оларның огородка хүн бүрүде кылыр ажылы кылдыр чаңчылчаан. Улуг-Хем кожууннуң Херээженнер болгаш Хоочуннар чөвүлелдери “Өг-бүлениң шыгжамыры” төлевилелдиң угланыышкыны-биле “Эң эки огородчу” деп мөөрейни чарлаан. Ону “Эң эки ногаажы”, “Эң эки чечектер өстүрүкчүзү”, “Эң эки садчы” деп үш номинацияга эрттирген. Мөөрейниң организакчылары ону чарлаары-биле кызыгаарлаттынмайн, хемчегниң киржикчилериниң чайны өттүр ажылы-биле таныштырып, оларның ногаа болгаш чечек аймаан канчаар тарып өстүрүп турарының дугайында видеоматериалдарны тырттыргаш, социал четкилерге үндүрүп, чонга таныштырып турган. Улуг-Хемниң Хайыракан суурнуң чурттакчызы Саяна Дандар-ооловна Ховалыгның чечектерни канчаар тарып өстүрүп турарын, ооң бажыңының девискээрин янзы-бүрү чечектер чараштыр бүргээнин кижилер аажок сонуургап көргеннер. Эйлиг-Хем суурнуң чурттакчызы, хоочун ногаажы Долаана Кимовна Дамдын ногаалардан чемнерни канчаар кылырының мастер-класстарын эрттиргени чонга аажок ажыктыг болган. Ногаа болгаш картофель дүжүдүн өстүреринге амыдырал-чуртталгазы берге байдалда кижилерге дузалажып, буянныг чорукту кылып турар ажыл-ишчилер база бар. Таңды кожуунда сайгарлыкчы Байлак Ооржак бодунуң шөлүн берге байдалдыг кижилерге картофель тарып өстүреринге тускайлап берген. Байлак Григорьевичиниң шөлүнден картофель дүжүдүн казып алыр күзелдиг кижилер, Таңды кожууннуң чагыргазының ажылдакчылары демнежип тургаш, 3 тонна картофельди ажаап алган. Ол картофельди чуртталгазы берге байдалдыг өг-бүлелерге бээр. Республиканың хоорай, суурларынга сентябрь 19-та дүжүттүң күскү ярмарказы болуп эрткен. Эрткен чайын тарып өстүрген ногаазының дүжүдүн тус черниң чурттакчылары аңаа делгеп, чонга саткан. Ш. МОҢГУШ. Чурукту кожууннарның чагырга черлериниң соцчеткилеринден алган. “Шын” №37 2026 чылдың сентябрь 24