💥Тываның чурттакчылары соңгулдаларга Владислав Ховалыгны деткээн — 24 сентября 2026 г. в 06:00:08.435
💥Тываның чурттакчылары соңгулдаларга Владислав Ховалыгны деткээн 📢Республиканың Соңгулда комиссиязы сентябрь 18-тен 20-ге чедир эрткен үш хүннүг бадылаашкынның түңнелдерин үндүрген. Тываның амгы Баштыңы Владислав Ховалыг бүрүткеттинген соңгукчуларның ниити санының 90,95 хуузунуң азы 159283 үннү алгаш, бүзүрелдиг тиилээн. Күрүне Думазының тоску чыыжының чаңгыс мандаттыг округ соңгулдаларынга «Чаңгыс демниг Россия» партиядан кандидат, Россияның Маадыры Буян Куулар 133019 үн-биле тиилээн. Тывада соңгукчуларның киржилгези 82 хуу ажып, чуртта рекордтуг көргүзүгже кирген. Владислав Ховалыг соңгулда кампаниязынга киришкен чаңгыс чер чурттугларынга четтиргенин илереткен. Соңгулдаларга чурттакчыларның хөй үнү чурттуң болгаш регионнуң келир үезинге сонуургалдың бадыткалы дээрзин демдеглээш, чуртта болгаш республика соңгулдаларынга «Чаңгыс демниг Россия» партияның тиилелгези бедик бүзүрелдиң демдээ деп демдеглээн. Тываның Баштыңы республиканың чурттакчылары «Чаңгыс демниг Россия-биле» кады келир беш чылда регионнуң хөгжүлдезин тодараткан Улусчу программаны ажылдап кылганын сагындырып, ам соңгукчуларның бүзүрелин шынзыдарын аазаан. Ол ышкаш Тывага соңгулдалар оожум байдалда эрткенин демдеглеп, ону организастаарынга болгаш бадылаашкын үезинде корум-чурумну хандырарынга киришкен кижи бүрүзүнге өөрүп четтиргенин аңгы илереткен. «Бо соңгулдалар меңээ бодумга улуг ужур-уткалыг. Бистиң командавыстың сөөлгү беш чылда кылган ажылынга шынчы үнелел кылдыр көрүп тур мен. Деткимчеңер дээш база үн бүрүзү дээш четтирдим! Бистиң чаңгыс демниг чоруувус болгаш социал-экономиктиг хөгжүлде программаларын кады боттандырып турарывыс Тывага чечектелиишкинни болгаш өг-бүле бүрүзүнге чедиишкиннерни болгаш даартагы хүнге бүзүрелди эккээр дээрзинге бүзүрээр мен» — деп, Владислав Ховалыг регионнуң чурттакчыларынга кыйгырыында чугаалаан. А. МОНГУШ. Чурукту ТР-ниң Чазааның парлалга албанындан алган. “Шын” №37 2026 чылдың сентябрь 24