💥12 муң ажыг уругга халас спортчу секциялар
💥12 муң ажыг уругга халас спортчу секциялар 📢«Россияда спорт» күрүне программазының күүселдези-биле Тывада уругларның күш-культура болгаш спортка белеткенип киржир аргалары калбарган. Республиканың Спорт яамызынга хамааржыр 23 албан черлери халас киржип болур спортчу бөлгүмнерни уругларга саналдаан. Уругнуң назы-харындан, чурттап турар черин көрүп, спорттуң хевирин саналдап турар. Республиканың спорт школаларында хүреш, бокс, дзюдо, сумо, самбо, кикбоксинг, шыдыраа, футбол, волейбол, баскетбол, хоккей, стол теннизи, хаактыг чарыш дээш оон-даа өске спортчу хевирлерге секциялар бар. Чамдык угланыышкыннар уругларны 6 азы 7 харлыындан хүлээп эгелээр. Спортчу секциялар Кызыл хоорайдан аңгыда, республиканың кожууннарында база бар. Ак-Довурак, Туран, Чадаана, Шагаан-Арыг, Мугур-Аксы, Хандагайты дээш оон-даа өске черлерде кичээлдер эртип турар. Ол чүүл уругларга шилип алган спортунга бажыңының чоогунга доктаамал белеткенир арганы берген. Кожууннарның спорт школаларында спорттуң аңгы-аңгы угланыышкыннарындан шилилде улуг. Бай-Тайга кожууннуң уруглары баскетбол, бокс, кикбоксинг, волейбол, хүреш, футбол, сумо, дзюдо, хоккей, ча адарының секцияларынче барып болур. Сүт-Хөл кожуунда баскетбол, бокс, волейбол, дзюдо, хүреш, сумо, футбол, шыдыраа база чиик атлетика секцияларынга кичээлдер эгелээр. Кызылда спорт албан черлериниң угланыышкыннары каш янзы. «Олимп» спорт школазының уруглары дзюдо, кикбоксинг, хүреш, ча адарын база боксту шилип алыр аргалыг. Школада 800 ажыг өөреникчилер бар. Спорттуң национал хевирлерин хөгжүдери – аңгы угланыышкын. Спорттуң национал хевирлерин хөгжүдер төпте хүреш база шыдыраа секциялары уругларны 7 хардан хүлээп эгелээр болза, ча адарының секциязынче 10 хардан эгелеп бижидер. Төптүң өөреникчилеринге кичээлдер база халас. Республикада кадыкшылы кызыгаарлыг уругларга база спорт-биле өңнүктежир аргаларны тургускан. Адаптивтиг спорт школазында хостуг хүреш, дзюдо, стол теннизи, шыдыраа, ча адар, пауэрлифтинг талазы-биле секциялар эртип турар. Кадыкшылы кызыгаарлыг оолдар, уруглар хууда реабилитация болгаш абилитация программазы-биле секцияларже халас баар. А. МОНГУШ. Чурукту ТР-ниң Чазааның парлалга албанындан алган. “Шын” №36 2026 чылдың сентябрь 17