💥Владислав Ховалыг Тываның кадет корпузунуң материал-техниктиг байдалын хынаан
💥Владислав Ховалыг Тываның кадет корпузунуң материал-техниктиг байдалын хынаан 📢Тываның Баштыңы «Тываның кадет корпузу» республиканың школа-интернадынга четкен. Владислав Ховалыг школаның өөредилге корпузун болгаш ниити чуртталга бажыңын хынаан соонда, өөредилге инфраструктуразын чаартыр программаже киирерин дааскан. Коллектив-биле хөгжүп сайзырадырының аргаларын база оларның келир үеде планнарын өөреникчилер-биле сайгарган. Владислав Ховалыг Чазак Даргазының оралакчызының болгаш өөредилге сайыдының хүлээлгезин күүседип турар Алексей Сазан-оол баштаан бөлүк-биле кады школаже кирип бар чорааш, тускай шериг операциязының үезинде дайынчы хүлээлгезин күүседип тургаш, маадырлыы-биле амы-тынындан чарылган школа-интернат ажылдакчыларынга болгаш доозукчуларынга тураскаалга чечектерни салган. Маадырларның — школаның директору чораан Айдыс Александрович Сааяның, доозукчулары Айвар Константинович Оюннуң, Алдын-Херел Анатольевич Чымбал-оолдуң, Алдын-Херел Аянович Ховалыгның, Хүреш Антонович Данзырынның — аттарын бижээн тураскаал самбыралар төрээн школазынга келген кижи бүрүзүн уткуп ап турганзыг. Өөредилге чериниң өөреникчилери болгаш ажылдакчылары камгалакчыларның тураскаалын хүндүлеп, үнелеп чоруурун башкы директор Алдынай Даржай чугаалаан. Школа-интернаттың үш каът бажыңы болгаш өөреникчилер чурттаар ийи бажыңны 1963 чылда туткан. Улуг чаартылгалар херек апарган дээрзин хыналда көргүскен. Владислав Ховалыг албан черин улуг септелге программаларынче киирер айтырыгны дарый шиитпирлээрин Алексей Сазан-оолга дааскан. Владислав Ховалыг школа коллективи-биле ужуражылга үезинде амыдыралдың берге байдалдарынга таварышкан уругларны өөредип кижизидер ажылдыг школаның башкылар, техниктиг ажылчыннарынга өөрүп четтиргенин илереткен. Республика Баштыңы школаның үстүкү классчылары-биле база чугаалашкан. Оларның мергежил шилилгезиниң планнарын ол чугаа үезинде сонуургаан. Элээди оолдар, уруглар инженер, бортпроводник, эртемден, сайгарлыкчы болур күзелдерин илереткеннер. Владислав Ховалыг өөреникчилерниң шилилгезин мактап, ак орукту, өөредилгезинге кызымаккай болурун, башкыларының чагыг-сүмезин дыңнап чоруурун күзээн. 2017 чылдың январь 9-та ийи өөредилге албан черин: республиканың өскүс болгаш ада-иезиниң хайгааралы чок арткан уругларның школа-интернады база республиканың кадеттер школа-интернадын каттыштырып, «Тываның кадет корпузу» республиканың школа-интернадын тургускан. Школаның өөредилге программазында кадеттерге угланган эртемнер база бар: чыскаал, от белеткели, эге шериг белеткели, шериг топография, бал танцылары, кадеттер хору. Школа төөгү, математика, физика, даштыкы дылдар, амыдыралдың айыыл чок чоруу, күш-культура болгаш эге шериг белеткели дээн ышкаш эртемнерни колдады өөредип, шериг-спортчу угланыышкынныг кылдыр санадып турар. ТР-ниң Чазааның парлалга албаны.