💥Шойдак-Хелиңниң дагылгазы
💥Шойдак-Хелиңниң дагылгазы 📢Эрткен чүс чылдың бежен чылдар төнчүледир «Бурунгаар» колхоз кежигүнү Шойдак-Хелиң Кызыл-Дагга чурттап орган. Колхозка хамааржыр Шаңчыда он муң гектар хову-шөлдерге арбай-тарааны эртежик чаштырып доозупкан. Ужур билир кезек улус сүмелешкеш, Шойдак-Хелиңни бүдүү чалап, оран-таңды эки дүжүт хайырлаарын бодап, Шаңчының Суг-Бажынга ак чем чажып, шо-төлге шууттуруп, судур номчуттуруп, дагылганы чоруткан. Ол чылдарда Шаңчының ховуларындан гектар санындан 65 центнер элбек дүжүт ап турган үелери. Чаагай тараалыг моожаларны Москваның Улусчу ажыл-агый чедиишкиннериниң делгелгезинге (ВДНХ) салып турган. Тараажылар шаңнал-мактал, алдар-хавыяа четкилээн. Ынчалзажок кижилер чыып, бүдүүлүк чорук кылып, эргиниң артынчызы хуурмак ёзулал Шаңчыга чорутканын ожааваан, билбээн сен дээш, «Бурунгаар» колхозтуң партком секретары, дайын киржикчизи Андрей Навачыганович Сундуйнуң херээн Улуг-Хемниң райком партия бюрозунга дыңнап көөр база партия кежигүнүнден үндүрер доктаал төлевилели белеткеп турган. Ол хүн Тока дарга Барыын кожууннарже сургакчылап эртип чорааш, ол бюро хуралынга душ бооп киришкен. Сөөлгү айтырыгга А.Н. Сундуйну тургузуп алгаш, херээн дыңнаан. Тока дарга: — Буруу бар бол, кадыг-дошкун дайын киржикчизи, хүндүлүг киживисти кежигүнден үндүреривиске кайын болур – дээш, доктаалды ойталаткан. Бюро кежигүннери улуг даргазының саналынга каттышкан. «Хыл кырынга келген херекти улуг дарга эки шиитпирлежип бергенинге хөлчок амыраан мен, партия херээнден өлгүжеге чедир чарылбас мен» — деп, Андрей Навачыганович меңээ бо-ла чугаалай бээр кижи. / Дегут ДЕМЧИК. “Шын” №35 2026 чылдың сентябрь 10