💥Бирги соңгуур эрге
💥Бирги соңгуур эрге 📢Аныяктар ордузунга ортумак профессионал болгаш дээди өөредилге черлериниң студентилеринге өөредилге шуулганы болуп эрткен. Киржикчилер соңгулданың чорудуун, хамаатыларның идепкейиниң, аныяктарның хөй-ниити амыдыралынга сагыш-сеткилинден киржилгезиниң чугулазын сайгарган. Илеткелчилер аныяктарга соңгулда дугайында бүгү чүүлдү бөдүүн болгаш билдингир дылга тайылбырлап берген. Чапсар үезинде национал танцы-самныг, сыгыт-хөөмейлиг чогаадыкчы көргүзүглерни бараалгаткан. Кижи бүрүзү бодунуң эргелерин болгаш оларны ажыглап билири чугула. Хамаатыларның харыысалгалыг хамаарылгазындан ниитилелдиң келир үези хамааржыр. Ылаңгыя боттарының туружун бир дугаар илередип, шын шилилге кылыр аргалыг болган аныяктарга бо дугайында тайылбырлаары чугула. Эксперттер боттарының ажылын сайгарып, чугула айтырыгларны шиитпирлеп, аныяктарга ажыктыг сүмелерин берген. Таныштырылга үезинде киржикчилерге соңгулдаларның чорудуу канчаар эртип турарын база үениң аайы-биле ол канчаар өскерлип турарын сонуургаткан. Студентилерниң алган билиглери шын шилилгени кылырынга болгаш хөй-ниити амыдыралынга харыысалгалыг болурунга дузалаар. Студентилерге ужуражылга ажыктыг болгаш солун эрткен. Аныяк-өскен чугула медээлерни ап, билдинмес айтырыгларын салып, боттарының эргелерин болгаш хүлээлгелерин эки билип алзын дээш, мындыг хемчеглерни чылдың-на эрттирерин кызыдып турарын организакчылар демдеглээн. Бистиң корр. “Шын” №35 2026 чылдың сентябрь 10