| ШҮЛҮК КЫДЫРААЖЫНДАН |
| ШҮЛҮК КЫДЫРААЖЫНДАН | • Вадим ЧЫКАЙ, шүлүкчү дайынчы. * * * Ханныг дайын шөлдеринге, Каржы дайзын аразынга Аалывыстың, чуртувустуң Адын сыкпаан эштеримге мөңге алдар! Хачыландыр халдап киргеш, Хайыра чок тулчуп тургаш, Тураскаал бооп хуула берген Туруштуг мээң эштеримге мөңге алдар! Дуруяалар болуп хуулуп, Дугаланып ырай берген, Хүлээлгезин күүседип каан Хүндүткелдиг маадырларга мөңге алдар! Чакпыыл октан, частыышкындан Чалыы чүрээ сокпайн барган, Эгин кожа тулчуп чораан Эштеримге мөңге алдар, мөңге алдар! • Лидия ООРЖАК, Россияның Чогаалчылар эвилелиниң кежигүнү. АВАҢ СЕНИ МАНАП ОРАР, ОГЛУКУМ Хаарып турар чайның изии турза-даа, Каас-шиник, карак өөртүр болза-даа, Сеткил-хөөнде харлыг дүвү шуурганнаан, Сергектенир харык-шинээм былаашкан... "Сагыжыңны балыглава, авай" – деп, Чассыг оглум сымыранган ышкаш боор. Дүне, хүндүс амыр-дыш чок муңгарап, "Дүвүрелге алзып чор мен, оглукум". Хая көөрге, караш кынныр чүү-даа чок! "Кайда сен?!" – дээн айтырыымга харыы чок. Бүгү оран – ээнзиргей, шимээн-дааш чок, Бууккан хөңнүм ажыдып бээр кижи чок. Сүттүг сарыг шайым чажып чалбардым: "Сүлдең бедик, чанып кээр сен, эргимим. Аваң сени, шыдавыже, манап аар, А сен, бертик – кандыг-даа бол, чанып кел!" Арты-мурнум ээнзиргей бол, ыглаваайн. Арт-сын ашкан оглум чанып чедип кээр. Иешкилер кужактажып орупкаш, Ишти-хөңнүн ырга-шоорга тө кааптар. "...Аваң сени, шыдавыже, манап аар, А сен, бертик – кандыг-даа бол, чанып кел!" Чанып кел!!! АЛГЫШ Төрел аймак чидиригге таваржып чор. Төөгүнүң хугбай багы тергиидеп тур. Чаа-дайын уржуун чонум чүктеп-ле чор. Сагыш-сеткил оожургалы кажан келир? Ада-ие, төрелдерниң чөлеңгиижи, Ажы-төлдүң чассып ханмас чоргааралы, Даайларының эрес, шоваа чээннери Талыгырдан таныттынмас чанып кээп тур. Төрээн черим шыпшык даглар Ээлери, Дөргүн, шынаа, кара суглар Ээлери, Ыдыктыг үш Эртинениң айызалы Ырак черде төлдеривис камгалаңар! Хөө, кузум сеткилдиглерге сөнезин! Хөгжүм-музык муңгак ыры дыңналбазын! “Шын” №34 2026 чылдың сентябрь 3 Чурукту ГигаЧатка чураан.