💥Тывада 23 хөй-ниити шөлдери чаагайжыттынган
💥Тывада 23 хөй-ниити шөлдери чаагайжыттынган 📢Бо чылын Тывада «Амыдыралга инфраструктура» национал төлевилелдиң «Таарымчалыг хоорай хүрээлеңин тургузары» регионалдыг төлевилели-биле чаартып турар хөй-ниити шөлдериниң чаагайжыдылгазы доозулган. Республика регионнуң шупту муниципалдыг тургузугларында ниитизи-биле 31 хөй-ниити черлерин 2026 чылга чедир чаагайжыдарын планнаан. Бо хүнге чедир 23 объектиде ажылдар доозулган, оон аңгыда элээн каш улуг төлевилелдерни бүрүнү-биле боттандырган. Бай-Тайга кожууннуң Тээли суурда «Даш чонукчуларының парыгы» база Кызылда «Уругларның эртем шөлчүгежи» деп төлевилелдерниң 90 хуузун кылыпкан. Республиканың өске-даа объектилеринде тудуг ажылдары шалыпкын чоруп турар. Шагаан-Арыгда Медицинская кудумчузунда сесерликтиң кижи кылаштаар черинде брусчатканы чадып, гранит плиталарны салып турар. Мөңгүн-Тайга кожууннуң Мугур-Аксы суурда төлевилел езугаар «Алдар аллеязында» чаагайжыдылга ажылдары уламчылавышаан. Барыын-Хемчик кожууннуң Эрги-Барлык суурда тудугжулар кижи маңнаар шөлдүг хөй ажыглалдыг спортчу шөлде ажылдап эгелээн. Чаа-Хөл суурда дыштанылга сесерлиинде резин шывыгны эптеп салып турар. Өске-даа объектилерде бичежек архитектурлуг дүрзүлерни тургузуп, чырык болгаш өске-даа чаагайжыдылга ажылдары дооступ турар. Ажылды үезинде доозарындан аңгыда, хөй-ниити шөлдери чурттакчыларга эптиг, айыыл чок, сонуурганчыг кылдыр кылыры чугула. Чылдар эртсе-даа, чаагайжыттынган черлер бодунуң овур-хевиринге ол-ла хевээр артып каары чугула деп Тываның тудуг яамызы демдеглээн. Таарымчалыг хоорай хүрээлеңин тургузар дээн тергиин төлевилелдериниң Х бүгү-российжи мөөрейинге тиилээн Кызыл биле Туран хоорайларның төлевилелдери база боттаныышкында. Найысылалда «Тываның тос эжии» төлевилел-биле ажыл уламчылап турар. А Туранда «Тываның хаалгазы» деп төлевилел доозулгалак. Ол хоорайның төп кезээ — Комсомольская кудумчузу болгаш «Пятак» шөлү чаарттынып, өскерли бээр. Эрги тротуарны ап каапкаш чаагайжыткан, «Сыыннар» деп бичии тураскаалдарны салган, чырык чагыларын садып алган. Амгы үеде брусчатка чадар ажылдар чоруп турар. Ажылдың чорудуун доктаамал хайгааралда алган. Тудуг организациялары доктааткан хуусаазында шупту ажылдарны доозар ужурлуг. Интернет таварыштыр видеохайгаарал чорудар ажылды Кызыл биле Туран хоорайларга эгелээри көрдүнген, ынчан чурттакчылар чаагайжыдылга ажылдары кайы хире чоруп турарын хайгаарап көөр аргалыг апаар. ТР-ниң Чазааның парлалга албаны.