💥Россияның Тывада Шииткел күүселдезиниң федералдыг албаны Тубтен Шедруб Линг хүрээзинг...
💥Россияның Тывада Шииткел күүселдезиниң федералдыг албаны Тубтен Шедруб Линг хүрээзинге болган видео-экскурсияның көргүзүүн бараалгаткан 📢Делегей чергелиг IV буддийжи шуулган үезинде Россияның Тывада Шииткел күүселдезиниң федералдыг албанының Хөй-ниити чөвүлелиниң даргазы Радмила Оюн «Тубтен Шедруб Линг» деп солун көргүзүг-видео-экскурсияны организастаан. Индияга 17 чыл чурттааш, философияның магистри (ачарья) чадазын камгалап алгаш, буддийжи эртемни чедип алган Россияның буддийжи университединиң ректору хүндүлүг Начын Кунуужап Ачарья гелонг гид-экскурсовод болган. Начын Кунуужап Россияның эң бедик буддийжи хүрээзи – «Тубтен Шедруб Линг» дугайында тодаргай чугаалаан. 1992 чылдың сентябрь 19-та Тывага бир дугаар кээп чорааш, ыдыктыг XIV Далай-Ламаның айыткан черинде хүрээ турарын ол онзалап демдеглээн, ол йөрээл-ёзулалды эжик аксында тураскаал даш сагындырып турар. Хүрээ комплекизин 2023 чылда байырлыы-биле ажыткан, ол хүрээ Күжүгет Шойгу аттыг культурлуг фондунуң акша-хөреңгизи база республиканың чурттакчыларының деткимчези-биле туттунган. Дыка хөй шииттирген кижилер хүрээниң өндүр чаагайын иштинден-даа, даштындан-даа бир дугаар көөр аргалыг болган. Көрүлде үезинде шииттирген кижилер буддийжи философияның алыс шынын ажыдып, хүрээниң кайгамчык архитектуразы, библиотека, музей болгаш Россияның буддийжи университеди-биле таныжып алганнар. Видео-экскурсияны көрген соонда, хайымныг сайгарылгалар эгелээн: хоругдаттырганнар «Тубтен Шедруб Линг» хүрээзиниң дугайында боттарының санал-оналы-биле үлежип, буддизмниң кандыг черлеринге барып чораанын база оларның кайызы оларга онза эргим болгаш чүге ындыгыл дээрзин чугаалап турганнар. Ындыг хемчеглер төрээн чериниң шажын-чүдүлгезинге, төөгүзүнге, культуразынга сонуургалды оттурарынга дузалаар болгаш кижилерге, дириг амытаннарга, долгандыр делегейге сеткилинден ынакшылды кижизидер. Экскурсияны белеткээринге Россияның Тывада Шииткел күүселдезиниң федералдыг албанының чанында Хөй-ниити чөвүлелиниң даргазынга болгаш кежигүннеринге, ол ышкаш «Тубтен Шедруб Линг» хүрээзинге, Россияның буддийжи университединге, Тываның А. Пушкин аттыг национал ном саңынга база Тываның Алдан-Маадыр аттыг национал музейинге өөрүп четтиргенивис илередип тур бис. Россияның Шииткел күүселдезиниң федералдыг албанының Тыва Республикада эргелелиниң парлалга албаны.