💥Чаа ном
💥Чаа ном 📢Россияның болгаш Тываның чогаалчылар эвилелиниң кежигүнү чогаалчы Дегут Демчиктиң чогаадыкчы ажылын номчукчулар ооң “Частың чылыы”, “Дергиге чаа четкелек мен”, “Судактарның шулураажы”, “Авам мени аажок мактаан”, “Үрбүн-ашпал эргий...” дээш өске-даа номнарындан билир. Төрээн чери Чаа-Хөлдүң чараш бойдузунуң, ооң кижилериниң, бичии чаштарның чаптанчыг аажы-чаңының дугайында чараш сөс-домактыг шүлүктери номчукчуларга дыка сонуурганчыг. Чогаалчының чаа ному “Үш өңнүг ыы” деп ат-биле чырыкче үнген. Ооң арыннарындан шүлүктерни номчукчуларга бараалгадыр-дыр бис. ДИИҢ-СЫРБЫК Өөлет оглунуң өеэ ак Кулактары сыргаларлыг, Кудуруун чүктепкен Хады, пөште дииң-сырбык Казыттынып олургулаар. Хөөрүк биле селбер дииң Көскүлеңнеп халыгылаар. ҮГҮ Чырык хүннүң дургузунда Сыпыйтыр-ла удуур чаңныг. Үгү дааш чок, даамай ужар. Үгү дүне чем тыптынар. Арай кежээ аал чоогу Аргага кээп хөктеп эдер: “Үк-үүк-үүк” – дээш, каттырар-даа, “Үк-үүк-үүк” – дээш, ыглай-даа бээр! КУШКАШ ООЛДАРЫ “Бүрү, сиген аразында Бүдүү черде уяларда Кушкаштарның чуургаларын Ол-бо тудуп, суйбап болбас, Кулаш черден чыдыыргааш, Оолдарын каапкаш баар” – деп, Авам бисти ынчалбазын Аажок сургаан орар кижи. Чажыт чыдар уязында Чараш дөрт-беш чуургалар, Хөй-даа хонмайн, частып келир. Хөлчок кызыл аастарын Ажыдып кээр оолдарынга Ава кушкаш ужуп келгеш, Аксында хөй сээк-маазын Аастарже үлей супкаш, Күжүр дораан ужуп-ла каар – Курт-сээк катап эккээри ол. ЭЛИК-ХҮЛБҮС Коң-коң ыыттыг, Коңдаалайында саадактыг. Эртен-кежээ аал чоогу Эзим-каътка элик-хүлбүс Элээн чоокта огургулап, Эткен үнү дыңналгылаар. «Шын» №33 2026 чылдың август 27