💥Боодал чечектерни салып, мөгейген
💥Боодал чечектерни салып, мөгейген 📣 Август 15-те бистиң республиканың чону Тыва Республиканың хүнүн демдеглеп турар. Аңаа тураскаадып Тыва Арат Республиканыӊ тургузукчузу Буян-Бадыргы ноянныӊ найысылал Кызылда тураскаалынга мөгейип, чүзүн-баазын өӊнерлиг дириг чечектер салыр байырлыг ёзулалды эрттирген. Аңаа Тыва Республиканың Баштыңы Владислав Ховалыг, ТР-ниң Дээди Хуралының Даргазы Каң-оол Даваа болгаш чазак-чагырганың өске-даа төлээлери, удуртукчулары, сайыттары киришкен. Оон аңгыда байырлыг езулалга аңгы-аңгы албан черлериниң ажылдакчылары, хөй-ниитижилер, идепкейжилер дээш хөй-хөй күзелдиг кижилер база келген. Байырлыг митингини ажыттынган деп чарлаан соода, Россия Федерациязының болгаш Тыва Республиканың ыдык ырларын салган. Ооң соонда Тываның Баштыңы Владислав Ховалыг тыва чонунга байырын чедирип, сөстү алган. Тыва Арат Республиканыӊ үндезилекчизи Буян-Бадыргы ноянның тураскаалынга хүндүткел ёзулалын болгаш мөгейигни кылып турда, Тыва күрүнениң тургустунуп турган үезинде орус омак-сөөктүг чон тывалар-биле эгин кожа кады ажылдап чораанын база ниитилел-политиктиг болуушкунга улуг рольду Иннокентий Сафьянов ойнаан дээрзин ТР-ниң Баштыӊы Владислав Ховалыг демдеглээн. "Эргим чаңгыс чер чурттугларым! Тыва күрүнениң тыптып тургустунарынга үлүг-хуузун киирген Тываның төлептиг оглу Монгуш Буян-Бадыргыны чон утпас. Ооң кылган ажыл-херектерин уламчылап, Тывавыстың хөгжүлдези дээш бүгү күжүвүстү өргүүр бис" — деп, ол чугаалаан. Буян-Бадыргы Монгуштуң Тываның төөгүзүнге кылган ажыл-ижин онзалап демдеглээн соонда сактыышкынның минутазын чарлаан. Тываның келир үеде сайзыралынга чедиишкиннерни күзээш, ооң чурттакчы чону өгбелериниң арттырып берген ёзу-чаңчылдарын арттырып, төөгүнү төлептии-биле уламчылаар дээрзин демдеглээш, Буян-Бадыргы ноянның тураскаалынга чечектер салыр ёзулалды кылган. Чыжыргана СААЯ. Буян ООРЖАКТЫҢ тырттырган чуруктары.