💥АЖЫКТЫГ СҮМЕЛЕР
💥АЖЫКТЫГ СҮМЕЛЕР Бажың-балгат аштап-арыглаар херекселдер суп алырынга пластик хааржактыг болуру күзенчиг. Ында-мында тарадыр салып алган херекселдерин тыппайн, үе чидирериниң орнунга, чаңгыс черге чыып алыры эптиг. *** Хол четпес черлер аштаарынга диш чуур щётканы ажыглап болур. *** Изиг-соок суглуг, унитаз, раковиналыг бажыңнарга уксус албан турар болза эки. Ооң-биле бүгү сантехниканың каъгын үндүр чугдуруптар. *** Шаланың доозунун чүлгүүрде, сугже хепке ажыглаар кондиционер азы шампуньну хөй эвести холуп алыр. Ындыг суг-биле чодуп каан шала белен хирикпес. *** Кухняда дораан хиригип каар хире чүүлдерни чем ораар шылыргай плёнка-биле шып алырга эки. Хириккен савадан плёнканы адырып кааптары белен. *** Дүлген эъттиң амданы улам эки болзун дээш, эскен соонда, ону фольга-биле шыпкаш, 10-20 минута дургузунда «дыштандырыптар». *** Согуна биле морковьту үске быжырып тура, дүрген алдын-сарыг апарзын дээш, бичии чигирни бызап болур. Чүгле согунаны алдынналдыр быжырарда, кургаг далганны бызаптар. *** Идик иштиниң багай чыдын чидирерде, ооң иштинче хондур чем содазын уруп каар азы кургаг шайлыг хапчыгашты суп каар. *** Өйлеп-өйлеп бажыңның «изиг точкаларын» аштап-арыглаары чугула. Эжик тудаларын, сайгылгаан кыпсыр включательдерни, розеткаларны чүлгүп ап турар ужурлуг, чүге дээрге олар унитазтардан артык хөй бактерияларны чыып турарлар. Чуруктарны ГигаЧатка чуруткан. Шын №30 2026 чылдың август 5