💥Доозукчу маадырлар-биле ужурашкан
💥Доозукчу маадырлар-биле ужурашкан 📢Тываның Күрүне университединге онзагай ужуражылга болган. Кадыының байдалы кызыгаарлыг студентилер спортка, удуртулга адырынга база Төрээн чуртун камгалаарынга улуг чедиишкиннерлиг болган ТывКУ-нуң доозукчулары-биле ужурашкан. Руслан Очур — делегей чергелиг класстың спорт мастери, Россияның дөрт дакпыр чемпиону, Европа чемпионадының тиилекчизи, ча адар талазы-биле Россияның чыынды командазының кежигүнү. Чаныш-сыныш чок болгаш бодунга бүзүрел чүгле маргылдааларда эвес, а амыдыралда база дузалаар дээрзин спортчу чугаалаан. Вадим Сат — ТШО хоочуну, «Тываның маадырлары» регионалдыг программаның киржикчизи, Тыва Республиканың Администрациязының болгаш Чазактың Аппарадының хоойлу-дүрүм үрээр чорукка профилактика талазы-биле эргелиниң консультантызы. Ооң төөгүзү — камгалакчыдан канчап хамааты албанче шилчи бергени ылап үлегер болган. Конгар Кылаң-оол — ТШО хоочуну, «Тываның маадырлары» регионалдыг программаның киржикчизи база Кызыл хоорай мэриниң чөвүлекчизи. Ол төрээн хоорайы болгаш республиказының чаагай чоруу дээш айтырыгларны шиитпирлеп алырынга дайынчы акы-дуңмалышкы болгаш тиилелгеже күзел-сорук амгы үеде канчаар дузалап турарын бодунуң арга-дуржулгазы-биле үлешкен. Ужуражылганың аалчылары кол чүүлдерни — кандыг-даа байдалда бодунуң чолун канчаар тып алырын, салым-чаяанныг кижилерге күрүне канчаар дузалап турарын, ол ышкаш хагдынчак болбайн, бурунгаар чүткүүрү чугула дээрзин чугаалааннар. Студентилерге амгы үениң маадырлары-биле бо ужуражылга ёзулуг дириг чугаа болган. Ужуражылга соонда оларның кайы бирээзи болдунмас чүүл боттаны бээр, ооң сылдызы чаа-ла кыптыгып келир деп шиитпирни хүлээп алыр чадавас. Бистиң корр. Медээни болгаш чурукту ТывКУ-нуң социал четкиде арнындан алган.