💥Чаа чуртталга комплекизин ажыткан
💥Чаа чуртталга комплекизин ажыткан 📢Кызылдың «Южный» микрорайонунда «Солнечный» деп чаа чуртталга комплекизин ажыткан. «Восток» КХН тудуг компаниязы 48 хөй аал чурттаар, тос каът ийи чуртталга бажыңын ажыглалче киирген. Республиканың Баштыңы Владислав Ховалыг чаа оран-саваның чурттакчыларынга байырны чедирип, таарымчалыг хоорай хүрээлеңин хөгжүдериниң чугулазын демдеглээн. «Бистиң республиканың чедиишкиннери федералдыг деңнелге безин көскү. Тыва «Амыдыралга инфраструктура» национал төлевилелдиң сорулгаларын хуусаадан эрте күүсеткен регионнар санынче база кирген» — деп, республиканың Баштыңы демдеглээн. Амгы үениң чуртталга бажыңнарының тудуу регион чурттакчыларының амыдырал-чуртталгазының шынарынга дорт салдарлыын база демдеглээн. Тываның Баштыңы төлевилелдиң бедик шынарлыг болгаш үе-шаанда доозарын хандырган тудугжуларга болгаш керээ чарган организацияга өөрүп четтириишкинниң онзагай сөстерин илереткен. Компанияның директору Сергей Уюсовтуң чугаазы-биле алырга, чуртталга комплекизиниң тудуун хуусаадан сес ай эрте тудуп дооскан. “Бистиң чуртта чиигелделиг ипотекалыг регионнарны салаа базып санап болур дээрзин шупту билир бис. Бо айтырыгны шиитпирлээринче кайы хире хөй ажыл, күжениишкин үндүргенин билип тур мен. Бистиң чиигелделиг ипотекавыстың эң кол кижизи Владислав Товарищтайович. Мындыг шиитпирни хүлээп алганы дээш, четтиргенивис илередиилиңер” – деп, «Восток» КХН-ниң директору Сергей Уюсов чугаалаан. Хөй ажы-төлдүг өг-бүле, Маадыр ие Айнааш Ондарга дүлгүүрлерни тывысканы — ёзулалдың онзагай кезээ болган. Айнааш Владимировна он ийи ажы-төлүн кижизидип өстүрүп чоруур. Өг-бүлениң ээзи амгы үеде тускай шериг операциязының зоназында хүлээлгезин эрттирип чоруур шериг албанныг. Улуг оглу база дайынчы хөделииишкиннер хоочуну, дайынчы даалгалар үезинде көргүскен маадырлыг чоруу дээш Суворов медалын тывыскан. Бо белек Айнааш Владимировнаның улуг өг-бүлезинге кызыгаар чок ынакшылы болгаш кызымаккай күш-ажылынга төлептиг шаңнал болган. «Биске квартираны тускайлап бергени дээш, республика Баштыңынга четтиргенивис илередип тур бис. Өг-бүлевистиң өмүнээзинден мындыг деткимче дээш четтирдивис» — деп, Айнааш Ондар чугаалаан. Үрде манааны оран-савазының аас-кежиктиг ээлериниң аразында Биче-оолдарның өг-бүлези база бар. Олар 54 дөрбелчин метр шөлдүг квартиразын 6 хуулуг өг-бүле ипотеказы-биле садып алган. “Транспорт харылзаазы, уруглар садтары, школа чоок болганы дыка эптиг. Таарымчалыг чурттаарынга херек бүгү чүве бар-дыр” — деп, Шораан Биче-оол өөрүшкүзүн илереткен. «Солнечный» чуртталга комплекизин амгы үениң негелделеринге дүүштүр туткан. Ол хааглыг боорда, чаагайжыткан девискээрлиг, уруглар ойнаар шөлдүг, автомашиналар тургузар чер адаанда парковкалыг, квартираларны таарымчалыг болгаш эптиг кылдыр таарыштыр туткан. Регионнуң удуртукчузу Владислав Ховалыгның санал-оналы база Президент Владимир Путинниң болгаш федералдыг чазактың деткимчези-биле боттандырган чиигелделиг ипотека программазы ёзугаар регионалдыг 2 хуулуг ипотека программазы-биле чамдык квартираларны чурттакчылар алган. Бистиң корр. Александр Ёнзактың тырттырган чуруктары. “Шын” №15 2026 чылдың апрель 23