💥“Тыва: Агроинвест- 2026”
💥“Тыва: Агроинвест- 2026” 📢Тыва Республиканың найысылалы Кызыл хоорайга бо чылдың апрель 9-10 хүннерде болуп эртер “Тыва: Агроинвест- 2026” инвестиция шуулганы Сибирь Енисейи агроүлетпүр комплекизинде чугула экономиктиг болуушкуннарның бирээзи. Бо чылда шуулган “Сибирьниң агроүлетпүркомплекизи – премиалдыг экопродукция” темага колдадыр эртер. Премиалдыг экопродукция – шынары шыңгыы экологтуг стандарттарга дүгжүр, сертификацияны эрткен дугайында тускай демдектиг барааннар. Оларның өртээ аар болуру чугаажок. Тываның арыг агаар-бойдузунуң байдалын алыр болза, эң ылаңгыя сүт, эът дээн ышкаш малдың премиалдыг экопродукциязын, эвээш хемчээлдиг-даа болза, бүдүрүп болурунуң аргазы бар деп эксперттер санап турар. Шуулганга федералдыг болгаш регионнар чергелиг органнар, инвесторлар, Сибирь федералдыг округта бараан бүдүрүкчүлери болгаш Кыдаттың, Моолдуң делегациялары киржир. Шуулганның ажыл-агыйжы программазынга инвестиция сессиялары, көдээ ажыл-агыйның чаа төлевилелдери-биле таныжылга дээш өске-даа хемчеглер болуп эртер. Кады ажылдажылга дугайында дугуржулгаларны болгаш керээлерни шуулганның киржикчилери аразында чарар. Эрткен 2025 чылда болуп эрткен шуулганга кады ажылдажылга дугайында 30 дугуржулгаларны чарган. Оларның чамдыызы Тывада, чижээлээрге, малдың уксаажыдылга ажылында боттандырып турар. Бистиң корр. Чурукту ТР-ниң Чазааның парлалга албанындан алган. “Шын” №13 2026 чылдың апрель 9