💥Тубтен Шедруб Линг хүрээде сарыг шажын музейи — 6 апреля 2026 г. в 09:00:04.784
💥Тубтен Шедруб Линг хүрээде сарыг шажын музейи 📢Тываның Тубтен Шедруб Линг сарыг шажын хүрээзиниң бирги каъдында Буддизмниң болгаш чырыдыышкынның музейи ажылдап эгелээн. Ол анаа-ла бөдүүн делгелге эвес. Ында чыып көргүскен экспонаттар — муң-муң чылдарда кадагалаттынып арткан чүдүлгениң, төөгүнүң күжүн бодунда сиңирген эрткен үеже кирер портал болуп турар. Экспозиция XVIII-тен XX чүс чылга чедир тыва хүрээлерге кадагалаттынып арткан 543 онзагай артефактыны болгаш ыдыктыг судурларны каттыштырган. Ол музейден чүнү көрүп болурул дээрге: Тхангки — торгуда минералдыг будуктар-биле чураан тибет бурганнарның овур-хевирин, Будда бурганның болгаш бодхисатвалар, өндүр улуг шажынчы башкыларның шырайларын ол чуруктардан көрүп болур. Тхангки уран чүүлү Тибетке VIII чүс чылда-ла тывылган болуп турар; Тус черниң мастерлериниң сиилбип кылган бурганнар дүрзүлерин. Тываның чурукчуларының демир, ыяш, пор-биле боттарының тускай уран чүүлүн тургузуп кылган кайгамчык ажылдарын; Сарыг шажынның хөгжүм херекселдери: сыын эдискизинге дөмей үн үндүрер бурээ деп улуг хөгжүм херексели, улуг-биче коңгалар, дамбыраларны; Ёзулалдарга болгаш “Цам” деп ламаларның көргүзүүнге ажыглаар костюмнар болгаш маскаларда кончуг нарын сырып даараан угулза, дүрзүлер хевирлерин; «Эвам Чойхорлинг» дуганының Уставы — 1912 чылда Лавран деп төвүт хүрээге сангхи дилээ-биле бижээн онзагай документ музейни сонуургап келген улустуң кичээнгейин хаара тудар. Ук музейде делгеттинген чүүл бүрүзү – анаа-ла экспонат эвес. Буддийжи ёзулал-биле ыдыктыг мөргүл сиңген хоочун эдилелдер болур. Ынчангаш кайгамчык эки чүүл сиңниккен, эки энергияның дамчыдыкчылары кылдыр санаттынар. Ол музей Тыва Республиканың Национал музейиниң структура аайы-биле бир кезээ болуп турар. Ооң фондузунда барык үш муң хире экспонат бар. Ооң хөй кезии 1954 чылда хагдынып турган хүрээлерден дамчып келген. / Бистиң корр. Чурукту “IV буддийжи шуулган–Тыва” деп соцчеткиде бөлүктен алган. “Шын” №12 2026 чылдың апрель 2