💥Отчетка хамаарыштыр бодалдар
💥Отчетка хамаарыштыр бодалдар 📢ТР-ниң кадык камгалал сайыды Анатолий ЮГАЙ: – Чоннуң кадык камгалалында чедиишкиннерни республиканың Чазааның 2025 чылда ажыл-чорудулгазының дугайында отчёдунга Тываның Баштыңы Владислав Ховалыг демдеглеп, эмчилер болгаш медицина сестралары дээш өске-даа эртем-билиглиг ажылдакчыларның ажылын эки деп үнелээни өөрүнчүг болду. Биске, медицина ажылдакчыларынга, ол база бир деткимче. Кижилерниң кадыкшылын хайгаараарынга, аарыгларны баш бурунгаар илередиринге диспансеризация кончуг дузалыг. 2025 чылда диспансеризацияны чурттакчы чоннуң 92 хуузу азы 261 муң ажыг кижи эрткен. Диспансеризацияның түңнелинде аарыгны илередири ооң хоочураар чоруун болдурбас дээрзин кижи бүрүзү билип алыры чугула. Эмнелгелерниң медицина техниказы-биле хандырылгазы сөөлгү 4-5 чылдарда экижээн. Эмнээшкин соонда реабилитация эрттиреринге херек 204 санныг дериг-херекселди 4 медицина организациязынга берген. Флюорографияның болгаш маммографияның сан-чурагайлыг көжүп чоруур 2 автомобилин бергени кожууннарже үнүүшкүннер үезинде өкпе болгаш рак аарыгларны баш бурунгаар илередир арганы тургускан. Тускай шериг операциязының киржикчилеринге медицина ачы-дузазын чедирери Тываның кадык камгалал ажылдакчыларының ажылының база бир кол угланыышкыны. 2025 чылда ТШО-нуң 123 киржикчизи болгаш оларның өг-бүлелериниң 203 кежигүнү эмнээшкинни эрткен. Тывада боттандырып турар губернатор төлевилелдериниң аразында “Кадык чуртталгаже орук”, “Ажы-төлдүң кадыынче орук” деп төлевилелдерни республиканың Кадык камгалал яамызының ажыл-чорудулгазының угланыышкынында боттандырып турар. Тыва Республиканың удуртулгазы федералдыг төп-биле сырый харылзааларны тудуп, акшаландырыышкынны чедип ап турарындан база Тываның кадык камгалал адырында экижиишкиннер дыка хамаарылгалыг болганын демдеглээр-дир мен. Буян Ооржактың тырттырган чуруу.