💥Отчетка хамаарыштыр бодалдар
💥Отчетка хамаарыштыр бодалдар 📢ТР-ниң Чазааның Даргазының оралакчызы Уран-оол ОНДАР: – Республиканың Чазааның 2025 чылда ажыл-чорудулгазының дугайында Тываның Баштыңы Владислав Ховалыгның отчёдунда регионнуң агроүлетпүр адырында байдалды сайгарып, чедиишкиннерни болгаш хожудаңгай чүүлдерни чөптүү-биле айытканын демдеглексей-дир мен. Чедиишкиннерге даяныр, хожудаашкыннарны ажып эртер дээш, моон соңгаар күжениишкинниг ажылдаар ужурлуг бис. Республиканың стратегтиг экономиктиг сорулгазы – үлетпүрде хожудаңгай чорукту ажып эртери, рыноктуг экономикада чижилгеге туржуп шыдаар бүдүрүлгелерни тургузары деп Тываның Баштыңының отчёдунда айыткан болгай. Тывада көдээ ажыл-агыйның чедиишкиннериниң кол көргүзүү – малдың баш саны чүү хире өскени. 2024 чылда малдың ниити саны 176 муң баш турган болза, 2025 чылда — 180 муң баш. Тываның кааңдаашкынныг агаар-бойдузунуң байдалынга чайгаар үнген оът-сигенни кышкы үеде четчир кылдыр белеткеп алыры берге, ынчангаш суггаттыг шөлдерге мал чемин тарып өстүрер ажылды күштелдирген бис. Алаш, Барлык дээш өске-даа суггарылга четкилерин чаартып септеп, оларны катап ажыглалга киирип, чаашкынналдырып суггарар арганы ажыглаарын катап эгидип турарывыс чедиишкиннерниң бирээзи. Эът-биле Тыва бодун боду четчир кылдыр хандырып турар регион. Харын-даа мырыңай өске регионнарже үндүр садып турар. Малдың эъдин, кежин, дүгүн долузу-биле болбаазырадыр ажыл республикада шуудаан. Республиканың Чазааның 2025 чылда ажыл-чорудулгазын Тываның депутаттар корпузу чөптүү-биле сайгарып, чедиишкиннерни деткип турары көскү-дүр. Ол дээрге Тывада социал-экономиктиг байдал чогумчалыг дээрзиниң демдээ-дир. Буян Ооржактың тырттырган чуруу.